Díli, 28 Outubru 2024__Tékniku Ajénsia TIC TIMOR I.P., liu husi Diresaun Dezenvolvimentu Sistema Informasaun no Aplikasaun (DDSIA) fó formasaun Web Portal ba funsionáriu husi Instituto Nacional de Farmácia e Pprodutos Médicos I.P (FPM).

Objetivu husi formasaun ida ne’e atu fasilita funsionáriu sira kona-ba oinsá atu jere no administra Portal refere, hodi transmite informasaun ba públiku.

Iha atividade formasaun ne’e, Xefe Departamentu Dezenvolvimentu, Implantasaun no Integrasaun Sistema Sr. Geovannio Frederico de Jesus Vinhas hato’o nia gratidaun ba FPM ne’ebé fó ona fiar ba TIC hodi suporta servisu sira ne’ebé ligadu ho kestaun teknolojia.

“Lori TIC TIMOR nia naran hau hato’o obrigado wain ba konfiansa tomak ne’ebé durante ne’e FPM fó mai TIC. Formasaun ida ne’e laos foin primeira vez realiza iha FPM,  maibé iha Governu anterior mós hala’o ona fornesimentu servisu sira ne’ebé ligado ho Sistema, laos de’it Web Portal, maibé iha sistema barak ne’ebé TIC dezenvolve ona, hodi fó apoiu ba liña Ministeriál sira. TIC TIMOR suporta nafatin em termus teknolojia nian, ne’ebé sai hanesan objetivu IX Governo Konstitusional atu alkansa implementasaun programa Governu Eletroniku”.

Xefi Departamentu ne’e mós informa katak, tinan ida ne’e TIC TIMOR tau prioridade ba kapasitasaun ligadu ho transformasaun dijitál ba funsionáriu administrasaun públiku sira hotu. Alende ne’e, agora dadaun mós tekníku TIC hala’o hela Assessment iha munisipiu sira hotu iha teritoriu nasional nia laran tomak, atu oinsa bele hatene klean  konteudu teknolojia dijitál  ne’ebé mak sei fornese iha tinan oin, hodi fó formasaun ba funsionariu públiku sira ne’ebé TIC sei servisu hamutuk ho INAP no KomisaunFunsaun Públika (KFP).

Iha fatin hanesan, Diretór Administrasaun  Planeamentu  Finansas Rekursu Umanu FPM, Sr. José do Carmo Martins hato’o agradesimentu ba TIC TIMOR ne’ebé sempre fó apoíu ba sira liu husi formasaun refere.

Diretór ne’e saliente tan katak, sira nia parte sente orgulu, tamba, hanesan Timoroan suporta malu hodi fahe koñesimentu, no ba futuru sira husu TIC atu fó formasaun nafatin iha sistema sira seluk, ne’ebé TIC dezenvolve ona.

Entretantu fromasaun ne’e hala’o iha edifísiu Instituto Nacional de Farmacia e produtos Médicos I.P (FPM) iha Kampo Alor.

Hafoin finaliza formasaun ne’e, TIC TIMOR mos fornese Sertifikadu Apresiasaun ba funsionáriu sira ne’ebé partisipa ona iha formasaun ne’e.

(Media TIC)