BOBONARO, 22 Outubru, 2024—Ekipa Ajénsia TIC TIMOR I.P. hala’o Sensibilizasaun Governu Eletróniku ba funsionáriu iha liña ministeriál sira iha Munisípiu Bobonaro nomós reprezentante autoriedade lokál sira.

Objetivu prinsipál husi sensibilizasaun ida ne’e, hanesan formas atu promove servisu dijitál iha kontestu Governu Eletróniku ninian.

Iha abertura sensibilizasaun, Diretór Diresaun Servisu Infraestrutura Rede Sr. André Felix Marques hateten, sosializasaun ne’e marka tan pasu importante ida atu hasa’e prestasaun servisu administrasaun públiku liu husi solusaun dijitál inovativu sira.

Papél importante husi Ajénsia TIC TIMOR haktuir ba dekretu lei númeru 29/ 2017 atu implementa polítika teknolojia informasaun no komunikasaun tanba ne’e, iha sensibilizasaun ne’e iha pontu importante lima ne’ebé sei aprezenta maka hanesan, Timor Dijitál, Sistema Aplikasaun sira ne’ebé dezenvolve husi TIC TIMOR, Infraestrutura Rede, Sentru Dadus no Seguransa Sibernétika.

TIC TIMOR nia programa sensibilizasaun ida ne’e, bazeia ba programa IX Governu Konstitusional ne’ebé previstu iha númeru 2.8 kona-ba Teknolojia Informasaun, no Komunikasaun no número 6.7 kona-ba Governu Eletrónika. Liu husi sensibilizasaun ida ne’e, sei aprezenta kona-ba servisu prinsipál sira relasiona hó Governu Eletróniku, tanba TIC TIMOR designadu hanesan Ajénsia implementadór iha programa IX Governu Konstitusionál.

TIC TIMOR servisu hamutuk ho Komisaun Funsaun Públika (KFP) no INAP sei halo preparasaun ba tinan oin bazeia ba programa IX Governu Konstitusionál kona-ba formasaun área teknolojia ba funsionáriu públiku tomak iha Timor-Leste, inklui nível Diretór sira. Sensibilizasaun ida ne’e konsidera importante tebes, antes atu tama ba implementasaun programa, nune’e, bele identifika koñesimentu funsionáriu sira nian, iha munisípiu hotu.

Liu husi programa rua ne’e TIC TIMOR sei hare nível koñesimentu husi funsionáriu sira, nune’e, bele servisu hamutuk hó parte INAP no KFP atu halo preparasaun ba matéria hodi bele halo kapasitasaun iha área teknolojia nian, iha tinan oin. husi Komisaun Funsaun Publik Diretór Interinu Sr. Alexandre da Costa hatete, apresia tebes ba inisiativa programa TIC TIMOR, ne’ebé envlove ona Komisaun Funsaun Públik hala’o programa sensibilizasaun governu elektroniku, ho era ida agora ita iha mudansa makas dezenvolvimentu bo’ot iha ita nia teknologia produtividade sae makas ho energia hodi bele dezenvolve Governu Elektroniku ho diak ba futuru. Komisaun Funsaun Públik konsienti katak liu husi sensibilizasaun TIC TIMOR espera katak loke funsionariu sira nia hanoin atu ita bele tau importansia ba Sistema dijital iha ita nia servisu fatin lor-loron.

Iha fatin hanesan, Prezidente Autoriedade Munisípiu Bobonaro Sr. Dr. Alexandre Pires Lic.Eco.M.M, hatete, iha oportunidade diak atu bele hetan koñesimentu konaba Sistema governu elektroniku hodi bele dezenvolve ita nia nasaun liu-liu iha munisipiu Bobonaro. Husu ba TIC labele kolen atu hanorin ami Bobonaro tenki iha avansadu no la’os TIC deit maibé kualker formasaun ne’ebé atu lori Bobonaro ba oin. Ita bo’ot sira hanorin iha Bobonaro hanorin mos iha maluk sira moris fatin, tanba ita mesak Timor oan, Timor TIC, Timor Bobonaro TIC. Entretantu sensibilizasaun ne’e hala’o iha Administrasaun Munisipál Bobonaro. (MÉDIA TIC)