Díli, 04 Novembru 2024— Diretór Ezekutivu Ajénsia TIC TIMOR I.P. Sr. Venâncio Pinto hamutuk ho ekipa hala’o enkontru ho Sua Exelensia Ministru Planeamentu Investimentu Etratejiku (MPIE) Eng. Gastão Fransisco de Sousa. 

Objetivu TIC TIMOR nian iha nkontru ida ne’e, atu halo aprezentasaun kona ba solusaun teknika no infraestrutura saida mak nesesita hodi implementa Smart City iha Rejiaun Administrativa Espesiál Oe-Cusse Ambeno no Atauro.  Nune’e, bele hetan apoíu husi MPIE relasiona hó infraestrutura, tanba infraestrutura mak sai hanesan chave prinsipál ba implementasaun Smart City iha Timor-Leste.

Iha oportunidade ida ne’e S.E. Ministru MPIE Eng. Gastão Fransisco de Sousa mós hakarak hetan informasaun kona ba oinsa TIC TIMOR ninia servisu ligadu hó konetividade, inklui tékniku sira ne’ebé sei apoíu iha munisipiu, no Fibra Ótika Terestre, ne’ebé oras ne’e atualmenta implementa dadaun.

Bainhira remata aprezentasaun Diretór Ezekutivu Ajénsia TIC TIMOR I.P. Sr. Venâncio Pinto informa katak, TIC TIMOR implementa ona Konetividade Lokál iha 12 Minisipiu, no iha futuru sei implementa mós iha RAEOA no Atauro.

Lider masímu Ajénsia ne’e mós haktuir tan katak, bainhira Smart City implementa ona iha RAEOA no Atauro, Díli nian mós sei implementa hó diak.

Diretór Ezekutivu mós hato’o agradesimentus ba S.E Ministru ne’ebé premite ona nia tempu hodi rona aprezentasaun kona ba implementasaun Smart City ne’e. 

“Smart City” nudar  “Cidade Matenek” ida ne’ebé uza teknolojia informasaun no komunikasaun (TIK) hodi aumenta efisiensia no melhora diak liu tan kualidade moris sidadaun nian.

Objetivu prinsipál husi Smart City mak oinsa sidade ida sai intelejente no aumenta efisiensia iha jestaun no rekursus. Alem de ne’e melhora diak liu tan konetividade no aumenta kualidade moris sidadaun nian, liuhusi servisu públiku sira ne’ebé diak.

Iha enkontru ne’e partisipa mós husi Assesor Servisu Rede Infraestrutura TIC TIMOR Sr. Askar Syarif, Ofisiál Rede Sr. Henrique Fulgencio Guterres, Teknical Writer Servisu Infraestrutura Sr. Salvador da Costa Oliveira inklui tekniku sira husi MPIE.

(Média TIC)