Díli, 21 Novembru 2024—Funsionáriu Ajénsia TIC TIMOR I.P. Partisipa iha sensibilizasaun kona-ba Cybersecurity Awareness ne’ebé partilla husi ekipa Kompania PT PCI Indonesia, PT SUHU KITA, no Greenbox Lda iha salaun Ministériu Transporte no Komunikasaun (MTK)

Atividade ne’e realiza ho objetivu husi dezenvolvimentu politika, prosedimentu no matadalan ISO 27001. Tanba ne’e presija partilla ba funsionáriu hotu-hotu nune’e bele iha koñesimentu hodi kontribui atu proteje infraestrutura no sistema sira ne’ebé fornese no jere iha TIC TIMOR I.P.  

Iha serimonia abertura formasaun sensibilizasaun ne’e, Diretora Ezekutivu Interina Ajénsia TIC TIMOR I.P. Sra. Helen Esmeralda Catarina Gomes hatete, funsionáriu sira presija partisipa iha atividade ne’e hodi iha koñesimentu kona-ba seguransa sibernétika.

“TIC TIMOR iha Únidade Seguransa Sibernétika iha hanoin atu dezenvolve matadalan seguransa sibernétika tanba ne’e, importante tebes atu asegura ita nia servisu liuhusi dadus sira ne’ebé kria iha TIC”, informa Diretora.

Diretora interina ne’e saliente tan katak, iha atividade ne’e funsionáriu sira laos de’it partisipa maibé bele mós fó sira ninia idea oinsa atu dezenvolve matadalan Standar Operasaun Prosedur ka (Standard Operating Procedure-SOP) TIC TIMOR nian tanba atu dezenvolve SOP presija idea husi funsionariu ida-idak hodi nune’e iha prosesu implementasaun ne’e hotu-hotu bele iha koñesimentu no komprende.

Iha biban ne’e lori Ajénsia nia estrutura tomak Diretora Ezekutivu Interina ne’e hato’o agradesimentu ba kompaña PT PCI Indonesia, PT SUHU KITA, no Greenbox Lda ne’ebé fahe ona koñesimentu ligadu ho Cybersecurity Awareness nian.

Iha biban ne’e mós Sr. Donny Fransiscus hanesan Education Consulting Manager PT. Kata Suhu Kita hatete, funsionáriu sira ninia partisipasaun iha sorumutu ne’e pertinente tebes hodi sira bele hetan feedback ne’ebé klaramente bazeia ba servisu Ajénsia TIC TIMOR nian.

“ Partisipasaun husi funsionáriu sira ne’e signifikativu tebes ba ami atu hetan informasaun no komprende klean kona-ba diskrisaun ne’ebé TIC halo ona, ninia prosesu no ema hirak ne'ebé iha TIC nomos ninia teknolojia ne’ebé importante tebes.

Sira nia parte mós hato’o gratidaun ba Ajénsia TIC TIMOR  ba konfiansa hodi sir abele fahe informasaun koñesimentu ne’ebé sira hatene.

Iha biban ne’e halo mós testing hodi haree efetivu husi funsionariu sira kona-ba Cybersecurity Awareness liuhusi  telemovel ida-idak nian.

iha atividade ne’e partisipa mós husi Assesor prinsipál Ajénsia TIC TIMOR nian, Diretór kada Diresaun, kargu Xefia sira inklui funsionariu sira hotu.

(Média TIC)