VIETNAM, 19 Novembru 2024 — Diretór Ezekutivu Ajénsia TIC TIMOR I.P. Sr. Venâncio Pinto hó koordenador Timor Dijitál Sr. Eusebio de Jesus Pinto Exposto Goveia no ekipa delegasaun husi MTK, akompaña S.E. Ministru Transporte no Komunikasaun (MTK) Eng. Miguel Marques Gonçalves Manetelu, partisipa iha Eventu Vietnam International Digital Week iha Ha Long City, Vietnam, husi dia 19 – 22 de Novembro de 2024.

Bainhira halo abertura ba serimonia ne’e Ministru Informasaun no Komunikasaun Vietnam nian Mr. Nguyen Manh Hung hatete, tinan-tinan Virtual Digitál Week (VIDW) nu'udar oportunidade ida ba Ajénsia Jestaun Estadu, Organizasaun Internasionál, Asosiasaun no Empreza Dijitál Globál sira atu diskute, fahe, estabelese parseria, no hamutuk hodi harii mundu dijitál ida-ne'ebé sustentável.

Iha fatin hanesan S.E. Ministru, Eng. Miguel Marques Gonçalves Manetelu, hato’o nia intervensaun katak, agora dadaun, Timor-Leste sidauk kompleta Asisténsia Virtuál (VAs) iha servisu governu nian. Kestaun ida ne’e akontese, tanba dezafiu iha infraestrutura, espesialidade no rekursu sira. Maibé, baze ba futuru dijitál sei dezenvolve hela.

Dezenvolvimentu importante ida mak Timor-Leste nia Kabu-Submarinu Sul (TLSSC), ne'ebé hein katak sei realiza iha inísiu 2025. Kabu-Submarinu Sul (TLSSC) sei hasa'e maka'as liu tan rede konetividade, loke odamatan ba teknolojia avansadu sira hanesan VAs.

S.E. Ministru mós esklarese tan katak, atu hametin liután ita-nia komitmentu, governu lansa ona "Timor-Digital 2032" hó nia planeamentu ba  tinan sanulu ne'ebé foka liu ba integrasaun ICT iha setór krítiku sira, inklui governasaun eletrónika, Edukasaun, Saúde, Agrikultura no Ekonomia.

Estratéjia ida-ne'e dezeña, hó nia objetivu  atu adapta ba oportunidade emerjente sira, no mós aliña ho prioridade dezenvolvimentu teknolojia sira.

Timor-Leste nia partisipasaun nu'udar observador iha diálogu dijitál ASEAN nian, atu kolabora no aprende husi parseiru rejionál sira. Esforsu hirak-ne'e, ho objetivu atu harii sistema ida-ne'ebé forte, hodi permite inovasaun sira hanesan “Virtual Assistant” (VA) sira atu hasa'e sidadaun sira-nia envolvimentu no atu alkansa prestasaun servisu píbliku nian ho fasil no lais.

Iha sorumutu ne’e, partisipante sira diskute no fahe prátika foun, aprosimasaun no inisiativa sira atu habelar kooperasaun entre nasaun iha ASEAN, organizasaun no empreza sira, kona-ba promosaun dezenvolvimentu Artificial Intelligent (AI), no implementa asistente virtuál sira, ho tópiku prioridade sira, inklui aplikasaun asistente virtuál, governasaun AI, Open-Source RAN, Enkuadramentu Legál ba 5G, Dezenvolvimentu Infraestrutura Dijitál no Literasia Dijitál.

Delegasaun husi Ministeriu MTK ne’ebé akompaña S.E Ministru mak hanesan, Assessor José da Costa, Sekretário Executivo Ministro, Adeodato de C. de Jesus, Diretór Diresaun Nasionál Infraestrutura no Komunikasaun (DNIK) Eng. Ambrosio Manuel Barreto Amaral, Diretor Executivo TIC TIMOR, Sr. Venâncio Pinto, Koordenador Timor Dijital, Sr. Eusébio Goveia, Assesor Autoriedade Nasionál Komunikasaun (ANC) Sr. João Freitas. Atividade ida ne’e realiza husi loron 19 to’o 22 de Novembro de 2024, iha Sidade Ha Long Vietnam.

(Média TIC)