ATAÚRO, 13 Dezembru, 2024—Ekipa Ajénsia TIC TIMOR I.P. hala’o Sensibilizasaun ikus kona-ba Governu Eletróniku ba funsionáriu iha liña ministeriál sira iha Autoriedade Administrativa Ataúro no mós reprezentante autoriedade lokál sira.

Objetivu prinsipál husi sensibilizasaun ida ne’e atu kapasita funsionariu sira hotu iha Timor-Leste no promove programa integradu Timor Dijitál iha futuru.

Iha abertura sensibilizasaun ikus ida ne’e, representante Diretór Ezekutiva TIC TIMOR I.P. Diretór Diresaun Servisu Dezenvolvimentu Sistema Informasaun no Aplikasaun Sr. Justo Fernandes hateten, Atu haree ba programa integradu Timor Dijitál iha tinan sanulu oin mai la’o oinsá .Objetivu ida ne’e importante tebtebes atu ita presiza prepara ita-nia an, saída maka ita presiza prepara, saída maka seidauk iha ita presiza completa atu ita labele hela iha kotuk.

Diretor DDSIA ESPLIKA,  iha pontu importante haat ne’ebé maka aprezenta hanesan, servisu infraestrutura, iha ne’ebé servisu infraestrutura teknolojia nian oinsá atu ita bele garantia servisu governu nian sira hodi bele iha asesu husi nível ka área remotas sira. Servisu sentru dadus, dadus pesoál sira no dadus governu ninian sentraliza iha sentru dadus hodi hafasil atu monitoriza husi governu. Servisu sitema aplikasaun, liu husi e-services ka servisu elektróniku, aplikasaun sira ne’ebé bele fasilita servisu governu ninian hanesan web portal no aplikasaun ajendamentu online. Seguransa sibernétika, servisu ida ne’ebé importante tebtebes atu fó seguransa ba iha servisu infraestrutura, sentru dadus no aplikasaun.

Tuir dekretu lei númeru 29/ 2017, papél importante husi Ajénsia TIC TIMOR nian atu implementa polítika teknolojia informasaun no komunikasaun, Aprezentasaun ba objetivu prinsipál sira ne’e atu hodi kapasita funsionariu sira iha timor-leste relasiona ho governu elektrónika nian tanba TIC TIMOR designadu hanesan Ajénsia implementadór iha programa IX Governu Konstitusionál.

Programa sensibilizasaun ida ne’e, TIC TIMOR Servisu hamutuk ho Ministériu Administrasaun Estatál (MAE), Komisaun Funsaun Públika (KFP), INAP no PROSIVU, programa sensibilizasaun ida ne’e halo nu’udar preparasaun ba tinan oin bazeia ba programa IX Governu Konstitusionál kona-ba formasaun área teknolojia ba funsionáriu públiku tomak iha Timor-Leste, inklui nível Diretór sira.

iha fatin hanesan, Reprezentante Prezidente Komisaun Funsaun Públika Sr. Marfilho Fidel Ávares Pereira hateten, atividade ida ne’e atividade importante tebes tanba era ida ne’e la’os ona era tinan ruanulu ka tolunulu liu ba kotuk, ita iha mudansa ne’ebé maka diferente tebtebes ho era ida uluk, era ida ne’e hanesan ita sa’e bero no laloran ida ne’ebé maka mai ita labele ses ona, tenke hasoru no tuir laloran ne’ebé maka iha, entaun se la adapta ka atualiza  an tuir teknolojia maka  sei hela iha kotuk.

Alende ne'e, Prezidente Autoriedade Administrativa Ataúro Sr. Mateus Belo, hato’o ninia apresiasaun boot ba Ajénsia TIC TIMOR I.P. ne’ebé servisu hamutuk ho MAE, Komisaun Funsaun Públika, INAP no PROSIVU ne’ebé iha inisiativa di’ak hodi partilla informasaun importante liga ba dezentralizasaun no governu eletróniku liu husi programa sensibilizasaun ida ne’e, nia subliña tan katak, Ita iha era ida ne’ebé importante ho teknolójia avansadu ita tenke adapta tuir no iha preparasaun husi meius sira ne’ebé maka ita iha atu ita labele lakon ho nasaun sira seluk. Iha oportunidade ida ne’e mós Prezidente Autoriedade Administrativa Ataúro Sr. Mateus Belo apela ba diretores, sefi departamentu no funsionariu sira tomak atu aproveita ho didiak loron ida ne’e.

Iha enseramentu sensibilizasaun ida ne’e, servisu diresaun no unidade TIC TIMOR nian ne’ebé mak halo aprezentasaun mak hanesan, Únidade Timor Dijitál, Diresaun Dezenvolvimentu Sistema Informasaun no Aplikasaun, Diresaun Servisu Infraestrutura Rede, Diresaun Sentru Dadus no Únidade Seguransa Sibernétika.

Entretantu Sensibilizasaun ne’e hala’o iha salão de encontroAutoriedade Administrativa Ataúro no atividade ne'e hanesan sensibilizasaun ikus liu ho nune’e programa sensibilizasaun ida  remata ho atividade enseramentu.

(MÉDIA TIC)