DISCURSO DIRETÓR EZEKUTIVU TIC TIMOR

“Retiro Anual TIC TIMOR: Dalan hodi Hadia Internal, Promove Koordenasaun Servisu no Hametin Kapasidade Resiliência hasoru Dezafius sira iha tinan 2025”

Excelentissimo Eng. Miguel Mantelo Gonçalves

Ministru Transporte no Komunikasaun IX Governu Konstitusionál

Bom dia ba ita-bo’ot sira hotu!

Agradese tebes tanba ohin ne’e, loron importante mai ita-hotu, loron ne’ebé ita-hotu bele halibur malu iha fatin ida-ne’e, tanba ho Graça Nai Maromak Nian no tulun Matebian sira hotu, ohin, sei loke ita-hotu nia hanoin no neon hodi hare oituan ba kotuk atu hatene TIC agora iha ne’ebé no atu la’o loos ba ne’ebé.

Retiro loron-tolu ne’e, momentu oportunu alem de konsolida forsa de traballu TIC Timor ba oin, ita sei halo reflesaun klean no halo avaliasaun kona-ba ita nia servisu hamutuk durante tinan-ida nia laran. Tinan-ida, tinan ne’ebé nokonu ho esforsu maka’as, servisu ekipa no tempu duni mai ita hotu atu alista hamutuk progressus servisus TIC Timor nian ne’ebé hakerek iha indikadóres Programa IX Governu Konstitusional nian.

Direitores, chefes departementu sira no funsionáriu tomak;

Hanesan Diretór-Ezekutivu TIC Timor, ne’ebé, asumi responsabilidade liu ona tinan-ida-fulan-tolu hamutuk ho ita bo’ot sira hotu. Permite hau atu halo reflesaun badak ida, hodi fó diresaun ba pontus de avaliasaun iha ita nia retiro ne’e. Hau nia reflesaun ne’e nu’udar orgullu ba konkista hotu-hotu ne’ebé ita halao ona durante tinan 2024 nian.

Durante tinan 2024, servisu TIC Timor rezulta avanço primeiru maka hadia Edifísiu Foun ne’ebé performa ita-hotu nia orgullu hanesan instituisaun, ho intervensaun no servisu TIC konsege halo poupança liu $11 Milhões ba Orsamentu Estadu, TIC halo poupança internal – halo redusaun ba Salariu to’o $600 mil de dolares, promove no  hametin koordenasaun interministerial, mapeamentu forsa trabalho no distribuisaun rekursus umanos ho prinsípiu “the right person in the right place” – koloka rekursus umanus TIC nian tuir kompeténsia no méritu, involve iha organizasaun hodi asegura vizita Amo Papa Francisco, alargamentu prezensa TIC iha munisipius hotu-hotu, inklui RAEOA; no ita konsege estabelese baze de dados ho sentralizadu hodi prepara ba viabilizasaun polítika Governu Eletrónika.

Progressu sira ne’e hotu konta ho apoio Sua Excelência Ministru Miguel Manetelo, klaru ké ho imi hotu-hotu nia apoio mós. Hau hatene, ita seidauk halo buat barak, ita presiza servisu maka’as tán hodi hadia no konsensializa ita-nia populasaun sira, atu nune’e, uza téknolojia nu’udar meius adekuadu ba ita-nia dezenvolvimentu País nian.

Iha mundu teknolójiku no Timor-Leste nia adesaun ba Organizasaun Komersiu Mundial no ASEAN, ita sei hasoru dezafius bo’ot tebetebes. Alem de obrigasaun ba TIC Timor hodi proteje estadu ninia dados, teknolojia tenke sai oportunidade hodi hetan aproveitamentu ba siénsia, komunikasaun saudável no lais, no kontribui ba dezenvolvimentu ita nia País nia ekonomia. TIC Timor nia vizaun mak ne’e, maibé, vizaun ne’e mai kedas ho dezafius ne’ebé bo’ot tebes iha ita nia oin.

Senhor Ministru;

Direitores, chefes departementu sira no funsionáriu tomak;

Hodi responde dezafius sira, bele sai oportunidade ba Timor-Leste. Tanba-ne’e, hau hakarak Diretores no Chefe Departementu sira idak-idak lidera diskusaun ho kuidadu, matenek no solusaun kada departementu, ho linhas sira mak hanesan tuir mai:

1. Identifika ita-nia força, fracasos sira, oportunidades no ameaças. Aproximasaun metodu SWOT Analysis (Strength, Weakness, Opportunity and Threat) ne’e ita bele revela ka hatene ita-nia forças pozitiva sira, atu identifika no rekoñese problema potensial, nune’e, possivelmente sei aborda no buka solusaun.

2. Konsolida internal TIC Timor, momentu atu imi hotu-hotu, inklui hau, atu koñese malu didiak no hametin koordenasaun hodi foti papel bo’ot ba kontribuisaun iha área teknolojia no informasaun. Konsolidasaun internal ne’e depende ba komunikasaun ho étiku perfil kada ema idak-idak nian, diskute ho kakutak no rasional, fahe esperiensia ba malu, rona malu no importante liu maka kritika konstrutivu, labele ofende malu. Funsionáriu TIC Timor,  tenke siente ho instituisaun públiku ne’e sai instituisaun sosial kiik-ida, nu’udar família, ne’ebé desempenha papel importante ba responsabilizasaun ho modalidade servisu hamutuk, badinas, respeitu malu nune’e bele atinzi kresimentu tuir objetivu instituisaun no nu’udar indivíduo.

3. Halo reflesaun beibeik, retiro tenke sai oportunidade atu absorve ideias no hetan matenek foun, haraik-án no aprende ba malu, no rekoñese nia frakasu rasik, hodi nune’e, iha vontade atu hadia-án beibeik no halao servisu diak liután iha futuru. Tanba-ne’e; retiro ida-ne’e tenke loke-án ba kritika, no simu ho vontade hanoin diak sira. Ita-hotu tenke hanesan tasi, “bainhira udan, mota lori táhu, be-foer, materiais oin-oin tama hotu ba tasi laran; maibé tasi transforma táhu no foer hotu-hotu, nune’e halo tasi-ben moos nafatin hodi fó moris ba biota no ekosistema tasi nian”.  Ne’e signifika saída? Ita-hotu tenke simu ideias, kritika no ema seluk nia hanoin; depois mak tais nune’e bele kontribui ba dezenvolvimentu indivíduo no ba TIC Timor.

Diretores, chefes departementos no funsionárius sira hotu,

Linhas de orientasaun ne’e atu hametin TIC Timor ninia aliserse, nu’udar Diretór Ezekutivu, hau kompremete atu halo buat hotu-hotu, ho imi hotu-hotu ninia apoio iha tinan oin, tinan 2025, tinan ba servisu maka’as, tinan koordenasaun interministerial, no tinan ba “semangat baru - espirítu foun” tuir papel TIC Timor no kapasitasaun internal nian.

Hau fiar metin ba imi hotu! Família bo’ot TIC Timor ho estratéjia ida-ne’e, TIC Timor sei bo’ot ba beibeik, sai instituisaun públiku ida ne’ebé kontribui ba dezenvolvimentu tekonolojia País nian, no bele fó benefísiu ba Povu tomak.

Atu termina, hau soe hela mensajem ne’e ba imi-hotu atu kontinua tau ás intereses estadu nian, acima intereses pessoais no polítika partidária nia leten. Ho nune’e, respeitu tomak ba Sua Excelência Eng. Miguel Manetelu, Ministru Transporte no Komunikasaun, hau konvida hodi fó mensajem no orientasaun ba funsionáriu tomak TIC Timor.

Obrigado.

Dili, 18 Dezembru 2024

Vênancio Pinto, S. Kom.

Diretór Ezekutivu