DILI, 28 Dezembru 2024__ S.E. Ministru Transporte no Komunikasaun (MTK) Eng. Miguel Marques Gonçalves Manetelu fó pose ba Sr. Venâncio Pinto nu’udar Diretór Ezekutivu TIC TIMOR I.P. no Sr. José Asa nu'udar Fiskal Úniku   ba mandatu tinan lima.

Enkuantu Sr. Flavio Cardoso Neves nu'udar Prezidente Konsellu Administrasaun Autoridade Nasionál Komunikasaun sigla portugues (ANC) ho ninia membru konsellu administrasaun  nai'n haat.

Iha serimónia ofisiál ida ne’e, Ministru MTK Eng. Miguela Marques Gonçalves Manetelu hatete, avaliasaun hatudu katak, buat balun konsege halo ho rekursu ituan ne’ebé maka iha no iha buat balun ne’ebé seidauk tanba ne’e presiza hadi’a  iha tinan tuir mai.

”Ita labele hanoin de’it oinsá maka ita bele hetan  osan maibé, hanesan  timor oan ita hotu iha dever atu  asegura ita nia independénsia no ita nia soberania,” dehan S.E. Ministru.

Ministru apela ba dirijente sira hotu katak, nia parte hanesan membru Governu sempre ejiji ba dirijente sira hotu  no funsionaáriu sira oinsá maka atu servisu hodi bele kontribui ba metas sira ne’ebé IX Governu konstitusionál hatuur ona  iha ninia programa. Ida ne’e maka sai sasukat ida  tanba programa ne’e aprova ona iha Parlamentu Nasionál.

“Hanesan mós tinan sira tuir mai ita sei kontinua servisu hodi apoiu membru Governu sira  nomós parseiru sira. Ita buka atu fó apoiu ba malu  hodi fó buat di’ak ruma ba populasaun  liu husi idak-idak nia servisu,” informa Ministru MTK.

 Alende serimónia tomada de posse S.E. Ministru MTK hamutuk ho Emposadu Diretór Ezekutivu TIC TIMOR Sr. Venâncio Pinto nomós reprezentante husi Embaixa Austrália iha Timor-Leste lansa  relatóriu avaliasaun prontidaun Dijitál TIC TIMOR nian.

Iha biban ne’e, mós halo  aprezentasaun kona-ba rejumu avaliasaun servisu MTK inklui Ajénsia Autónoma sira nian .

Entretantu serimónia ne’e hetan partisipasaun másimu husi  membru Governu, korpu diplomátiku sira, parseiru dezemvolvimentu sira, família emposadu sira nomós funsionáriu sira husi MTK nomós Ajénsia tuteladu sira. (MÉDIA TIC)