Díli, 20 Fevereiru 2025 – Ajénsia TIC TIMOR I.P. no Autoridade Informasaun, Komunikasaun no Teknolojia Timor-Leste (ICT-TL), em kolaborasaun hó Trainocate husi Indonézia, hala’o Semináriu Internasionál ho tema“Transformasaun Dijitál Timor-Leste ba 2032”.

Eventu ne’e hetan apoiu máximu no orientasaun konstante husi S.E. Ministru Transporte no Komunikasaun, Eng. Miguel Marques Gonçalves Manetelu, ne’ebé exerse  mós kargu nu’udar Vise-Primeiru-Ministru no Ministru Koordenadór Ekonómiku em exercício. Ministru Transporte no Komunikasaun no Vise Primeiru Ministru no Ministru Koordenadór Ekonómiku Interinu, Eng. Miguel Marques Gonçalves Manetelu prezidi mos serimónia abertura ofisiál, ne’ebe destaka kona ba relevánsia hosi transformasaun dijitál ne’ebe importante tebes ba dezenvolvimentu nasaun nian.

Diretor Ezekutivu TIC TIMOR Sr. Venâncio Pinto, subliña katak teknolojia esensiál iha moris loroloron no oferese oportunidade foun ba instituisaun no setór privadu sira. Nia subliña mós katak Timor-Leste, maski nu’udar nasaun joven, maibé, tenke enfrenta dezafiu sira hosi globalizasaun teknolójika ne’ebe iha mudansa rápidu, tamba ne’e, nia solisita atu prepara an ba futuru dijitál ida ne’ebe nakonu hó kompetisaun ne’ebe alto. Liuhusi semináriu, péritu sira fahe koñesimentu kona-ba Sentru Dadus, Siberseguransa no Dijitalizasaun, hodi promove no troka ideia sira no hadi'a sira nia kapasidade.

Vise-Primeiru-Ministru ne’e, destaka papél krusiál teknolojia dijitál nian iha transformasaun sosiedade no melloramentu ba servisu públiku sira, nune’e, hatudu katak governu iha kompromisu atu moderniza administrasaun públika liuhosi dijitalizasaun, kria infraestrutura hanesan sentru dadus nasionál no promove siberseguransa. Nia salienta mos katak transformasaun dijitál la'ós limitadu de’it ba administrasaun públika, maibé tenke proporsiona mos kreximentu ekonómiku no inovasaun iha país ida ne’e.

Eventu ne'e konta hó partisipasaun hosi autoridade sira, akadémiku, setór privadu, sosiedade sivil no estudante sira, no iha propózitu atu promove kolaborasaun entre parte oi-oin hodi promove avansu inisiativa dijitál nasaun nian. Ikus liu, partisipante sira simu sertifikadu, hodi hakotu semináriu ne’e ho kompromisu atu kontinua dezenvolvimentu teknolojia iha Timor-Leste.