info@tic.gov.tl
+670 77050505
Objetivu husi sorumutu ne’e, kompañia Remala Abadi hakarak hatene di’ak liu tan kona-ba papél Ajénsia TIC TIMOR nian, nomós prestasaun servisu ne’ebé TIC TIMOR fornese ba insituisaun sira, nune’e, iha posibilidade mós ba kompañia Remala Abadi atu estabelese kooperasaun servisu ho TIC TIMOR.
Iha enkontru ne’e, Diretór Ezekutivu TIC TIMOR Sr. Venâncio Pinto hatete, TIC TIMOR hanesan úniku Ajénsia Teknolojia Informasaun no Komunikasaun (TIK) iha Timor-Leste ne’ebé harii bazeia ba dekretu lei númeru 29/2017 no tutela ba Ministériu Transporte no Komunikasaun (MTK).
Bazeia ba programa IX Governu konstitusionál nian, ne’ebé kontempla ona iha termu númeru 2.8, koalia kona-ba Teknolojia Informasaun no Komunikasaun, termus númeru 6.7, kona-ba Governu Eletrónika, ne’ebé Governu atribui ba TIC TIMOR hanesan misaun imperativu atu efetua nia implementasaun.
Xefe Ezekutivu informa katak, TIC TIMOR kompleta ona konetividade lokál iha Munisípiu 12 inklui RAEOA no Ataúru, nomós dezenvolve ona sistema dijitál lubuk ida ba instituisaun estadu sira.
“TIC TIMOR fornese ona liña lokál ba iha munisípiu 12 no RAEOA ho Ataúru, hodi asesu ba sistema Governu nian hanesan, Sistema Dalan ba Futuru, Freebalance, Email Ofisiál nomós sistema sira seluk ne’ebé Governu utiliza,” Diretór afirma.
Lider Másimu TIC TIMOR ne’e mós realsa tan katak, TIC TIMOR mós dezenvolve ona sistema no plataforma dijitál sira hanesan,Sistema Ajendamentu Online, Portal Ofisiál instituisaun sira, Plataforma ba Declaração de Rendimentos Bens e Interesses (DRBI) iha Timor-Leste, no sistema sira seluk ne’ebé dezenvolve internalmente (in-house development).
Iha fatin hanesan, ekipa husi Kompañia Remala Abadi halo aprezentasaun kona-ba servisu ne’ebé sira hala’o. Alende ne’e, ekipa rua mós halo diskusaun tékniku balun, kona-ba oinsá atu halo koperasaun servisu iha futuru.
Enkontru ne’e, hetan mós partisipasaun husi Diretór DDSIA Sr. Justo Fernandes, Diretór DSIR Sr. Henrique Fulgencio Guterres, Diretór DC Sr. Rusmin Vicente Soares, Xefe Unidade Ciberseguransa Sr. Agostinho Pereira Araújo inklui ekipa husi kompañia Remala Abadi husi Indonézia. (Média TIC)
