DÍLI, 12 Marsu 2025____Diretór Ezekutivu TIC TIMOR I.P., Sr. Venâncio Pinto ho ekipa hala’o enkontru koordenasaun servisu ho Sales Director, Systems Integration Specialists Company (SISCO) Sr. Andris Mansegi no ekipa husi Nippon Telegraph and Telephone (NTT), iha edifísiu TIC TIMOR Caicoli.

Objetivu husi sorumutu ne’e, kompañia SISCO no NTT hakarak hatene diak liu tan kona-ba servisu ne’ebé TIC TIMOR hala’o hela, inklui planu ne’ebé sei implementa, atu nune’e, kompañia rua ne’e bele servisu hamutuk ho TIC, liu-liu kona-ba kapasitasaun iha área ICT iha instituisaun estadu nian,  hodi bele adapta teknolojia foun.

Iha okaziaun ne’e, Diretor Ezekutivu TIC TIMOR I.P., Sr. Venâncio Pinto esplika, TIC TIMOR hanesan Ajénsia Governu nian ne’ebé responsabilidade ba Teknolojia Informasaun no Komunikasaun (TIK) nomós Governu Eletróniku. Iha tinan 2025 TIC foka liu ba interkoneksaun ba liña ministerais hotu.

Diretór Ezekutivu afirma tan katak, iha insituisaun estadu lubuk ida maka utiliza ona liña lokál ne’ebé fornese husi TIC TIMOR. TIC ne’e mós dezenvolve ona sistema informasaun ba insituisaun estadu hamutuk 130, ho forma gratuita.

“Oras ne’e dadauk instituisaun hamutuk 100 resin maka hetan ona koneksaun liña lokal husi  TIC TIMOR inklui insituisaun 80 maka hosting ona iha Centru Dadu Governu Eletróniku. TIC TIMOR mós dezenvolve ona sistema no plataforma dijitál sira hanesan, Sistema Ajendamentu Online, Portal Ofisiál Instituisaun sira, Plataforma ba Declaração de Rendimentos Bens e Interesses (DRBI) iha Timor-Leste, no sistema sira seluk ne’ebé dezenvolve internalmente (In-House development),” Informa Diretór Ezekutivu. 

Lider Másimu TIC TIMOR ne’e mós realsa liu tan katak, prioridade iha tinan ida ne’e, foka liu ba Governu Eletróniku ba liña ministériu haat, hanesan Ministériu Edukasaun, Ministériu Agrikultura, Ministeriu Saúde, nomós Ministériu Administrasaun Estatál (MAE). TIC TIMOR mos atualmente, observa hela lokal adekuadu hodi konstroe Centru Dadus ba âmbitu modernizasaun.

Iha fatin hanesan, Sales Director, SISCO Sr. Andris Mansegi afirma, sira nia parte prontu atu servisu ho TIC TIMOR iha área ICT nian tuir nesesidade ne’ebé TIC TIMOR iha, hodi bele adapta teknolojia ne’ebé modernu. Alende ne’e, ekipa tolu ne’e mós halo diskusaun tékniku kona-ba kooperasaun servisu ne’ebé sei estabelese iha futuru.

Enkontru ne’e hetan partisipasaun husi Diretór DSIR Sr. Henrique Fulgencio Guterres, Diretór DCD Sr. Rusmin Vicente Soares, Xefe Unidade Seguransa Sibernétika Sr. Agotinho Pereira Araújo, Xefe Unidade Timor Dijitál Sr. Eusebio de Jesus Goveia nomós Assessor Servisu Rede Sr. Askar Syarif.   (MÉDIA TIC)