Kovalima, 08 Setembru 2025____Ajénsia TIC TIMOR I.P. fó formasaun Information Communication Technology (ICT) ba funsionáriu públiku sira iha Munisípiu Kovalima ho tema “Proporsiona Asoens Formasaun iha Teknolojia Informasaun no Komunikasaun ba Dirijente Administradór, Kargu Xefia Funsionáriu Públiku no Ajente,”.

Objetivu husi programa formasaun ida ne'e, atu kapasita funsionáriu públiku sira oinsá utiliza sistema dijitalizasaun sira ne'ebé Governu iha, hodi bele implementa Governu Eletróniku iha administrasaun munisípiu sira hotu.

Iha serimónia abertura ba formasaun ne’e, Diretór Ezekutivu TIC TIMOR Sr. Venâncio Pinto hatete, TIC TIMOR hanesan Ajénsia ida ne’ebé tutela ba Ministériu Transporte no Komunikasaun (MTK) no progarama ida ne’e, nu’udar programa priodade IX Governu Konstitusionál nian ne’ebé, fó kompeténsia propria ba MTK liu husi TIC TIMOR atu implementa Governu Eletróniku no Teknolojia Informasaun no Komunikasaun. Dalan atu implementa maka liu husi formasaun ba  ajente estadu sira ka funsionáriu sira tenke iha kapasidade naton hodi utiliza teknolojia.

Atu atinji objetivu Governu Eletróniku meius ida maka TIC TIMOR halo dezenvolvimentu kapsitasaun liu husi formasaun ba funsionáriu iha instituisaun estadu tomak inklui Kovalima ne’ebé, ejiji atu halo jestaun ba sistema Governu hodi mellora liu tan iha parte atendementu públiku liu husi Sistema sira hanesan, online ka offline hanesan, tranformasaun husi sistema manual ba eletróniku.

“ Ha’u hanoin Kovalima komesa ona utuliza sistema sira ne’ebé maka TIC dezenvolve ona hanesan Sistema ofísiu nomós Sistema sira seluk,”.

Xefe Ezekutivu afirma katak, formasaun ida ne’e, hanesan meius ida atu kapasita funsionáriu públiku sira hotu, hahú husi dirjente to’o funsionáriu sira oinsá atu bele utiliza sistema ka aplikasaun báziku hanesan, Microsoft Office nomós kona-ba seguransa nian atu hatene oinsá proteje password husi atake sira antes hakat ba sistema avansadu.

Hanesan deskreve ona iha programa tinan liman nian, Teknolojia Informasaun no Komunikasaun nomós Governu Eletróniku koloka ona hanesan, pilar xave iha ajenda dezenvolvimentu nasionál ba tinan lima nian.

Ida ne’e, hanesan kompromisu estratéjiku ida atu hakuak transformasaun teknolojia dijitál nu’udar instrumentu ida atu hadi’a kapasidade funsionáriu públiku nian iha prestasaun servisu no hasa’e efisiénsia Governu nian no promove kresimentu ekonomia inkluzivu no sustentável.

“Husu ba funsionáriu tomak husi Munisípiu Kovalima nian tenke preparadu tanba iha situasaun global ne’ebé, konektadu liu iha era dijitalizasaun ba área atendementu públiku nian no seluk tan. Mundu agora avansadu no teknolojia sai hanesan komponete ne’ebé importante iha era globalizasaun,”.

Lider Másimu TIC TIMOR ne’e realsa tan katak, transformasaun dijitál hanesan, meius ida ne’ebé util no importante tebes hodi ajuda atu realiza tarefa lorloron no espera katak, hafoin formasaun ida ne’e, TIC TIMOR hametin liu tan kooperasaun atu nune’e kontinua servisu hamutuk iha aspeitu oioin iha área ida ne’e.

“Ohin pasu importante servisu hamutuk entre TIC TIMOR, INAP iha Plataforma matéria kapasitasaun. TIC TIMOR hanesan Ajénsia tékniku sei oferese tuir saida maka INAP presiza iha futuru ba ajente estadu sira,”.

Diretór Ezekutivu mós enkoraja nafatin partisipante sira ne’ebé tuir formasaun ne’e, atu bele aproveita didi’ak materia hirak ne’ebé formador sira fó durante semana rua nia laran.

Lori TIC TIMOR nian naran agradese ba MAE no INAP ne’ebé depozita ona komfiansa ba TIC atu servisu hamutuk nune’e,bele realiza formasaun ida ne’e iha Munisípiu Kovalima.

Iha fatin hanesan, Sekretáriu Administrasaun no Finansas Sr. Alberto Moniz de Araújo, agradese ba ekipa TIC TIMOR ne’ebé disponivel ona hodi fó formasaun ba funsionáriu sira iha Kovalima.

Husu ba partisipante sira atu partisipa formasaun ida ne’e, ho didi’ak atu nune’e ba futuru bele hahú utiliza ona Sistema dijitalizasaun sira.

Entretantu atividade ne’e, hala’o iha administrasaun Munisípiu Kovalima no partisipa mós husi Diretór Diretór Diresaun Servisu Infraestrutura Rede Sr. Henrique Fulgencio Guterres formador sira reprezentante husi INAP nomós Komisaun Funsaun Públika. (Média TIC)