ATAÚRU, 14 de Agostu de 2024- Ajénsia TIC TIMOR I.P., liu husi Diresaun Dezenvolvimentu Sistema Informasaun no Aplikasaun (DDSIA) nomós Diresaun Sentru Dadus fó formasaun Sistem Cloud GoTL no Sistema Email Ofisiál ba funsionáriu sira husi Autoridade  Administrativa Ataúru.

Objetivu husi formasaun ne’e, atu fasilita funsionáriu Autoridade Munisípiu sira hodi utiliza Sistema Cloud no Sistema Email Ofisiál hodi halo arkivamentu ba dadus no bele envia dokumentu ofisiálmente.

Bazeia ba programa IX Governu Konstitusionál númeru 2.8 ne’ebé ko’alia kona-ba Teknolojia Informasaun no Komunikasaun no programa 6.7 ko’alia kona-ba Governu Eletróniku.  TIC TIMOR iha responsabilidade ba polítika ICT nian nomós Governu Eletróniku ne’ebé atu kapasita funsionáriu sira hodi bele estandariza koñesimentu ba ICT iha Timor-Leste.

Iha abertura ba formasaun ne’e, Diretor Rekursu Umanu Munisípiu Ataúru Sr. Delfino Bartolomeu de Araujo agradese ba TIC TIMOR ne’ebé dezenvolve ona Sistema Email Ofisiál no Sistema Cloud GoTL hodi fasilita servisu Munisípiu Ataúru nian.

Administradór mós husu ba funsionáriu atu aproveita formasaun ida ne’e ho di’ak atu bele utiliza sistema sira ne’e iha servisu fatin.

Iha fatin hanesan Xefe Deaprtamentu Kapasitasaun TIC TIMOR Sr. Norberto Soares Cristovão hatete, TIC TIMOR liu husi Diresaun Dezenvolvimentu Sistema Informasaun no Aplikasaun (DDSIA) halo ona desiminasaun informasaun no fó formasaun ba sistema sira ne’ebé TIC TIMOR dezenvolve ona husi kapasidade tékniku sira ne’ebé iha.

Bazeia ba pedidu ne’ebé hato’o ba TIC TIMOR hodi dezenvolve sistema rua hanesan Sistema Cloud GoTL ninia objetivu maka atu halo arkivamentu ba dokumentu sira, kalendarizasaun no seluk tan. Nomós Sistema Email Ofisiál ninia objetivu importante tebes tanba bele komunika ba malu ofisialmente.

Iha mundu informátika ema koñese liu Email Ofisiál tanba ne’e TIC TIMOR la’os oferese dei’t ba Munisípiu Ataúro de’it maibé iha Insituisaun Estadu lubuk ida ona maka uza hela Email Ofisiál ne’e inklui órgaun Presidénsia Repúblika, Parlamentu Nasionál nomós Tribunal Rekursu. 

Liu husi biban ne’e, lori naran TIC TIMOR nian agradese ba Munisípiu Ataúru ne’ebé fó fiar ona ba TIC TIMOR hodi dezenvolve sistema hirak ne’e no hein katak, iha loron hira nia laran formasaun bele la’o ho di’ak.

Entretantu formasaun ne’e sei hala’o durante loron tolu (3) iha Autoridade Administrativa Ataúru.