DÍLI 22 Agostu 2024__ Ministériu Solidariedade Sosiál (MS) liu husi Insitutu Nasionál Seguransa Sosiál (INSS) hala’o desiminasaun informasaun kona-ba lala’ok seguransa sosiál ba funsionáriu TIC TIMOR I.P.atu nune’e funsionáriu sira bele iha koñesimentu di’ak liu tan kona-ba seguransa sosiál.

Seguransa sosiál nia objetivu atu proteje traballdor sira kontra risku sosiais iha vida tomak, subtitui rendimentu servisu iha situasaun wainhira lakon rendimentu, protesaun sosiál sei subtitui sira nia salariu.

Iha abertura ba sosializasaun ne’e, Diretora Esekutiva INSS Sra. Maria Antonia Siquera Gusmão, introduz katak, seguransa sosiál hanesan direitu fundamental trabalhadores sira nian, tamba ne’e, sira iha dever ne’ebe tenke kumpri atu bele hetan direitos ne’e sira iha.

Haktuir ba Konstituisaun RDTL iha termus artigu 56, ne’ebe previstu katak, sidadaun hotu-hotu iha diretu ba seguransa sosiál no asisténsia soiál tuir estadu nia kbiit. Nune’e, INSS iha papél importante atu halo sosializasaun ba instituisaun sira atu,  nune’e, funsionárius sira hotu bele iha konhecimentu kona ba funsaun seguransa sosiál nian.

Iha fatin hanesan Diretora Diresaun Servisu Korporativu TIC TIMOR Sra. Helen Esmeralda Catarina Gomes, agradese ba INSS ne’ebé fó ona tempu hodi halo sosializasaun kona-ba lala’ok seguransa sosiál nian ba funsionáriu TIC TIMOR hodi bele hatan ba dúvida sira ne’ebé durante ne’e funsionáriu hato’o. Diretora ne’e mós husu ba funsionáriu sira hotu atu  partisipa ho másimu atu bele kompriende di’ak liu tan kona-ba prosesu seguransa sosiál ne’e rasik.

Iha oportunidade hanesan, Diretor Atendementu Seguransa Sosiál Sr. José Soares mós halo aprezentasaun kona-ba lala’ok seguransa sosiál ne’e rasik.

Entretantu iha serimonia ne’e  hala’o iha edifísiu TIC TIMOR Kaikoli.