Ermera, 22 Agostu 2024—Ajénsia TIC TIMOR I.P. hala’o Sensibilizasaun Governu Eletroníku “Revolusiona Governu ho servisu dijitál ne’ebé asesivel promove Boa-Governasaun no hasa’e prestasaun servisu Governu nian ba funsionáriu liña ministerial sira iha Munisípiu Ermera inklui reprezentante autoriedade lokál sira.

Iha atividade ne’e, Diretór Diresaun Dezenvolvimentu Sistema Informasaun no Komunikasaun (DDSIA) Sr. Justo Fernandes hatete, TIC TIMOR ninia programa sensibilizasaun ida ne’e bazeia ba programa IX Governu nian iha programa 2.8 ne’ebé koalia kona-ba teknolojia informasaun no komunikasaun no programa 6.7 koalia kona-ba Governu Eletronika.

Bazeia ba programa ne’e iha tinan 2025 TIC TIMOR  sei hahu ho kapasitasaun ba funsionariu públiku  iha teritoriu Timor-Leste no munisipíu ermera sai nudar pilotu no sei ba mós iha RAEOA no Atauro.   

Diretór DSIA ne’e saliente tan, programa Governu prioridade hakarak implementa Governu Eletronika iha Timor-Leste tamba mundu ohin loron mundu teknolojia hakarak ka lakoi teknolojia hotu-hotu obrigatoriu tenke estuda no hatene.   

Utiliza teknolojia ema ida-idak bele asesu ba ninia dokumentu iha ne’ebé de’it hodi hala’o servisu iha tantu iha rai laran nomos rai liur.   

“Bainhira ita servisu ho dijitál iha fleksibidade-as tebes bele asesu ita nia dokumentu servisu sira bainhira ita halo viajem lokál no internasional dokumentu ita sei bele asesu no halo despasu iha nasaun ne’ebé de’it ninia benefisia tebes hodi ita hala’o servisu iha ita nia knar fatin hodi servi ita nia rain, dehan Diretór ne’e”.  

Iha fatin hanesan, Reprezentante Prezidente Autoriedade Munisipíu Ermera (PAM),hatete, planu servisu ne’ebé TIC hala’o ne’e diak tebes ba funsionáriu hodi aumenta sira ninia koñesimentu ne’ebé klean liutan kona-ba teknolojia.

“Programa ida ne’e importante tebes ba funsionáriu sira, liuhusi programa IX Governu ida ne’e hodi kordena ho TIC hodi hahu halo sensibilizasaun dijitalizaun no Governu Eletronika hatudu katak atividade Governu nian ba futuru ita la presija ona lori dokumentu to Dili maibé teknolojia mak moderniza buat hotu-hotu” dehan reprezentante ne’e.

Iha sensibilizasaun ne’e, parte hirak ne’ebé halo aprezentasaun mak hanesan,Únidade Timor Dijitál, Únidade Seguransa Sibernetika, Diresaun Dezenvolvimentu Sistema Informasaun no Aplikasaun, Diresaun Servisu Infraestrutura rede, Diresaun Sentru Dadus.

Entretantu atividade sensibilizaun ne’e partisipa mós husi Funsionáriu Ajénsia TIC rasik, Administradór hatulia, Xefi Gabinete PAM Munisipíu Ermera, Diretór Servisu Munisipál sira, Diretór Servisu delegasaun territorial, Xefi Departamentu nomos Funsionáriu Administrasaun Munisipál Ermera.

(Média TIC).