Díli, 06 Setembru 2024-Ajénsia TIC TIMOR I.P Asina kontratu ho Operadór Telekomunikasaun Telkomcel iha edifísiu TIC TIMOR kaikoli.

Asina akordu ne’e ho objetivu parte operadór telekomunikasaun Telkomcel bele fó apoíu backup liña internet iha loron vizita Apostólica Sua Santidade Papa Francisco iha Timor-Leste iha loron 09 fulan setembru tinan ne’e.

Iha serimonia asina akordu ne’e, Diretór Ezekutivu Ajénsia TIC TIMOR I.P Sr. Venâncio Pinto hatete, koperasaun servisu ne’ebé TIC ho Telkomcel asina ninia objetivu prinsipál mak oinsa bele asegura liña konetividade ho kualidade diak durante vizita Apostólica Sua Santidade Papa Francisco iha Timor-Leste.  

“Atividade asina kontradu ne’e ninia importante oinsa mak ita bele suporta vizita Santo Papa, ho oportunidade ne’e ha’u mós hakarak hato’ agradese ba Prezidente ANC ho DNIC ne’ebé ho ninia esforsu ita bele hetan solusaun ho Telkomcel hodi asina kontradu ida ne’e”

Hanesan lider Ajénsia TIC TIMOR nian hato’o agradese ba Telkomcel ho apoíu tomak no servisu ne’ebé mak TIC hamutuk ho instituisaun relevante sira halo ho operadór telekomunikasaun sira halo laos atu halo kompetisaun maibé atu asegura servisu ne’ebé diak durante vizita Apostólica Sua Santidade Papa Francisco iha Timor-Leste.

“Iha ne’e ita laos mai atu buka kompetisaun maibé ita hamutuk oinsa mak atu buka solusaun ne’ebé diak ba vizita Santo Papa ne’e , ha’u nia esperansa oinsa mak buat hotu bele lao ho diak. Ho ida ne’e ,ha’u hato’o obrigado barak ba Telkomcel ne’ebé prontu fó free bandwidth mai TIC, ida ne’e sai susesu ba ita hotu, at ita hotu ninia responsabilidade” husu Diretór Ezekutivu.

Iha biban ne’e mós, Prezidente Autoriedade Nasionál Komunikasaun sigla portugues (ANC) Sr. Flavio Cardoso Neves hatete, kooperasaun servisu ne’ebé hala’o ho Telkomcel sei la fó impaktu ba kooperasaun ne’ebé hala’o ona antes ne’e entre nivél politika sira.  

“Prosesu asina kontratu ohin loron la fo impaktu ba kontradu ne’ebé hala’o tiha ona ho  Menkominfo , atu hatete de’it katak entremus politika nasaun Indonesia ho Timor-Leste asina ona kontratu, ne’ebé asina husi S.E. Ministru Transporte no Komunikasaun (MTK) Eng. Miguel Marques Gonçalves Manetelu ho S.E Ministru Komunikasaun no Informatika (Menkominfo) Budi Arie Setiadi”.

Prezidente ne’e mós lori ANC nia naran hato’o obrigado barak ba Telkomcel ne’ebé prontu hodi apoíu atividade Governu Timor-Leste, espera ho konesaun ida ne’e bele ajuda no fó esperansa ba komunidade sira ne’ebé presija tebes konetividade durante vizita Apostólica Sua Santidade Papa Francisco ne’e.

Iha fatin hanesan, Chief Executive Officer of Telekomunikasi Indonesia Internasional (TL),S.A., Sr. Benedictus ArdiyantoPriyo hato’o ninia gratidaun ba MTK nomos Ajénsia TIC TIMOR ne’ebé fó ona fiar hodi apoíu Governu ba konetividade durante vizita Apostólica Sua Santidade Papa Francisco ne’e.

 “lori Telkomcel Indonesia internasional hato’o obrigado barak, naturalmente tinan 12 harii Telkomcel iha Timor-Leste laos tempu ne’ebé badak, ami sente hanesan familia no ema Timoroan. Telkomcel hanesan kompañia Timor-Leste ne’ebé ninia objetivu prinsipál mak oinsa suporta dezenvolvimentu nasaun Timor-Leste lori objetivu diak ba povu no imprinsipiu suporta programa Governu agora dadaun”.

Chief ne’e aumenta tan katak, konfiansa ne’ebé Governu Timor-Leste fó ba sira sai hanesan oportunidade hodi kontribui tamba konfiansa mak parte importante ida ne’ebé karun liu iha vida negosiu tanba ne’e sira espera ho konfiansa ne’ebé fó sira nafatin esforsu hodi fó servisu ne’ebé ho kualidade diak.

Entretantu iha serimonia ne’e marka prezensa mós Diretóres  sira husi Ajénsia TIC TIMOR I.P., Diretór DNIC, ekipaTelkomcel inklui tekniku sira husi TIC TIMOR nian.

(Média TIC)