DILI, 16 Setembru 2024__Ajénsia TIC TIMOR I.P. liu husi Diresaun Dezenvolvimentu Sistema Informasaun no Aplikasaun (DDSIA) fó formasaun jestaun administrasaun portal ofisiál ba funsionáriu husi Atoridade Turizmu Timor-leste I.P..

Objetivu husi formasaun ne’e,  atu kapasita funsionáriu hirak ne’e hodi bele jere no administra portal ofisiál hodi halo publikasaun ba atividade ATTL I.P. nian.

Iha abertura ba formasaun ne’e, Vise-Prezidente ATTL I.P. Sr. Ildefonso de Carvalho   hatete, ATTL ho TIC TIMOR servisu hamutuk ona iha fulan hirak liu ba hodi dezenvolve portal ofisiál tanba obra ne’ebé TIC TIMOR halo hanesan parte ida husi estadu nian no apoiu ona ba instituisaun estadu sira seluk.

Nia parte agradese ba TIC TIMOR tanba durante ne’e fó ona apoiu ba ATTL hanesan, portal ofisiál nomós Email ofisiál inklui kapasitasaun ba funsionáriu sira hodi bele jere konteudu husi portal ofisiál ne’e rasik.

Vise-Prezidente ne’e, husu ba formandu sira atu partisipa formasaun ne’e ho másimu atu nune’e bele jere rasik portal ne’ebé TIC TIMOR fornese ona.

Iha fatin hanesan Xefe Departamentu Sistema Aplikasaun Sr. Geovanio Frederico de Jesus Vinhas hatete, progresu servisu TIC TIMOR nian to’o ohin loron dezenvolve ona sistema sira ba instituisaun estadu barak ona no formasaun ne’e, parte ida husi progresu servisu ne’ebé TIC TIMOR halo hahú husi dezenvolvimentu portal to’o mai iha parte formasaun nian.

Xefe Departamentu esplika, formasaun ne’e, atu fasilita funsionáriu sira hodi bele jere no administra rasik portal refere atu nune’e bele atualiza konteudu sira maibé TIC TIMOR mós kontinua fó apoiu tékniku karik iha kestaun tékniku ruma ne’ebé maka ATTL rekere ba iha TIC TIMOR.

Nia parte lori Ajénsia nia naran agradese ba ATTL ne’ebé fó ona konfiansa ba TIC TIMOR hodi dezenvolve portal refere.

Alende ne’e, Formadora TIC TIMOR Sra. Adelia Soares, mós halo aprezentasaun kona-ba lala’ok utilizasaun portal ofisial ne’e rasik.

Entretantu formasaun ne’e, hala’o durante loron rua iha edifísiu ATTL I.P. Vila-Verde. (MÉDIA TIC)