Manufahi, 16 Setembru 2024—Diretór Ezekutivu Ajénsia TIC TIMOR I.P. Diretór Ezekutivu Ajénsia TIC TIMOR I.P Sr. Venâncio Pinto halo abertura ba Sensibilizasaun Governu Eletroníku “Revolusiona Governu ho servisu dijitál ne’ebé asesivel promove Boa-Governasaun no hasa’e prestasaun servisu Governu nian ba funsionáriu liña ministerial sira iha Munisípiu Manufahi inklui reprezentante autoriedade lokál sira.

Iha atividade sensibilizasaun ne’e, Diretór Ezekutivu hatete, objetivu prinsipál husi programa ne’e mak hasa’e koñesimentu TIC TIMOR no servisu ne’ebé Ajénsia fornese, TIC nudar Ajénsia Governu nian ne’ebé atu fasilita no fó asistensia ba kualker asuntu ne’ebé koalia kona-ba teknolojia informasaun no komunikasaun.

Ninia vantajen mak halo relatoriu la presija to’o nasionál, la gasta tempu, hamenus kustu, ida ne’e mak IX Governu ninia esforsu hodi muda servisu hotu ba eletroníku. Hasa’e koñesimentu husi dijitalizasaun no Governu eletroniku iha prestasaun servisu públiku no dezenvolvimentu sosioekominiku, informa superior Ajénsia TIC TIMOR ne’e.

Lider masímu Ajénsia ne’e mós halo introdusaun kona-ba ezistensia Ajénsia TC TIMOR ne’ebé ninia papél no responsabilidade iha área Teknolojia informasaun no Komunikasaun no Governu Eletroniku.

“TIC TIMOR ne’ebé hanesan Ajénsia Governu ida ne’ebé responsabilidade ba iha área teknolojia, drap no aprova estratejia ICT, prepara no implementa roll-out teknolojia responsabel servisu eletroniku, Ajénsia implementadór ba inisiativa E-Government, Ajénsia implementadór ba E services. Bazeia ba programa IX Governu Konstitusionál iha programa 2.8 ne’ebé ko’alia kona-ba Teknolojia Informasaun no Komunikasaun no programa 6.7 kona-ba Governu Eletróniku ne’ebé sai hanesan referénsia prinsipál ba TIC TIMOR atu implementa Governu Eletróniku”.

Diretór Ezekutivu saliente tan katak, iha tinan oin Timor-Leste tama ba Asean no tama ona ba organizasaun mundiál komérsiu Organizasaun Mundial Komérsiu (WTO, sigla Inglés) tanba ne’e TL tenke esforsu masímu hodi implementa Governu Eletroníku.

“ Bainhira ita sai membru ASEAN saida mak ita tenke halo, rekezitus ne’ebé ASEAN fó Timor tenke utiliza dijitalizasaun, era ida agora dadaun buat hotu ho teknolojia hakarak ka lakoi tinan oin Timor-Leste sei sai membru ASEAN nomos adere ona ba WTO, se ita sai membru ASEAN saida mak ita tenke halo rekezitus ne’ebé ASEAN fó, entaun ita hotu tenke esforsu-an tantu nasionál to’o munisipiu tenke prepara nia an ba iha mundu dijitál”.

Ida ne’e la ses husi planu IX Governu Konstituisional nian, iha tinan oin hakarak ka lakoi munisipiu hotu-hotu tenke adopta ona Governu eletroniku, hakarak ka lakoi munisipiu sira hotu tenke komesa utiliza E-mail, utiliza Cloud, sistema ofisiu sistema rekursu umanu, munisipiu sira tenke adopta ona, ida ne’e faze primeiru ne’ebé koalia kona-ba Governu eletroniku, se ida ne’e lao diak ona ita transforma fali ba Dijitalizasaun, dehan Diretór Ezekutivu.

Diretór Ezekutivu mós husu ba Funsionariu Autoriedade Munisipál Manufahi atu komesa utiliza sistema hirak ne’ebé mak fornese husi Ajénsia TIC TIMOR, TIC TIMOR prontu hodi apoíu bazeia ba pedidu ne’ebé husu. Espera Manufahi iha 2025 komesa hahu ona utiliza Governu Eletroniku nomos sistema dijitál.

Iha fatin hanesan,sekretariu PAM, Sr. Brigidio Deus hatete, Sistema dijitalizasaun ne’ebé TIC implementa vantajen boot ba Funsionáriu sira hodi hala’o servisu iha era teknolojia agora dadaun.

“Teknolojia informasaun no komunikasaun ne’e importante no pertinente tebes ba ita hanesan servidór estadu presija partisipa duni iha atividade ne’e, se bainhira ita la tuir sensibilizasaun ida ne’e sai kulpa boot tebes ba ita, tanba dijitalizasaun ne’e importante iha mundu modernu ida ne’e”.

Sekretariu ne’e mós lori PAM Manufahi husu agradese ba Ajénsia TIC TIMOR ho sensibilizasaun Governu Eletroníku ida ne’e bele iha koñesimentu kona-ba prosesu implementasaun dijitál iha rai laran.

Iha sensibilizasaun ne’e, parte hirak ne’ebé halo aprezentasaun mak hanesan,Únidade Timor Dijitál, Únidade Seguransa Sibernetika, Diresaun Dezenvolvimentu Sistema Informasaun no Aplikasaun, Diresaun Servisu Infraestrutura rede, Diresaun Sentru Dadus.

Entretantu atividade sensibilizaun ne’e partisipa mós husi Xefi Departamentu sira husi Autoriedade Munisipál Manufahi, Diretór Servisu Munisipál sira, Diretór Servisu delegasaun territorial, Xefi Departamentu nomos Funsionáriu Administrasaun Manufahi.

(Média TIC).