AINARU,19 Setembru 2024—Ekipa Ajénsia TIC TIMOR I.P. hala’o Sensibilizasaun Governu Eletroníku ho tema “Revolusiona Governu ho servisu dijitál ne’ebé asesivel promove Boa-Governasaun no hasa’e prestasaun servisu Governu nian,” ba funsionáriu husi liña ministerial sira iha Munisípiu Ainaru nomós reprezentante autoriedade lokál sira.

Objetivu prinsipál husi sensibilizasaun ida ne’e, oinsá atu promove servisu dijitál iha kontestu Governu Eletróniku ninian.

Iha aberuta ba Diretór Diresaun Dezenvolvimentu Sistema Informasaun no Aplikasaun (DDSIA) TIC TIMOR Sr. Justo Fernandes hatete, liu husi sensibilizasaun ida ne’e, sei aprezenta kona-ba servisu prinsipál sira kona-ba Governu Eletróniku tanba TIC TIMOR hanesan Ajénsia implementadór iha IX Governu Konstitusionál. TIC TIMOR servisu hamutuk ho Komisaun Funsaun Públika (KFP) no INAP sei halo preparasaun ba tinan oin bazeia ba programa IX Governu Konstitusionál kona-ba formasaun área teknolojia ba funsionáriu públiku tomak iha Timor-Leste inklui nivel Diretór sira.

Ho ida ne’e, sensibilizasaun refere importante tebes antes tama ba implementasaun programa atu nune’e bele identifika koñesimentu funsionáriu  sira nian  iha munisípiu hotu.

Diretór DSIA esplika, papél importante husi Ajénsia TIC TIMOR haktuir ba dekretu lei númeru 29/ 2017 atu implementa polítika teknolojia informasaun no komunikasaun tanba ne’e, iha sensibilizasaun ne’e iha pontu importante lima ne’ebé aprezenta maka hanesan, Timor Dijitál, Sistema Aplikasaun sira ne’ebé dezenvolve husi TIC TIMOR, Infraestrutura Rede, Sentru Dadus nomós Seguransa Sibernétika.

TIC TIMOR ninia programa sensibilizasaun ida ne’e, bazeia ba programa IX Governu nian iha programa 2.8 ne’ebé koalia kona-ba teknolojia informasaun no komunikasaun no programa 6.7 koalia kona-ba Governu Eletrónika.

“Liu husi programa rua ne’e TIC TIMOR sei haree nivel koñesimentu husi funsionáriu sira atu nune’e bele servisu hamutuk ho parte INAP no KFP sei prepara matéria hodi bele halo kapasitasaun iha área teknolojia nian iha tinan oin,” esplika Diretór DSIA

Iha fatin hanesan Prezidente Autoridade Munisípiu Ainaru Sra. Manuela Georgina Carmo Bucar Corte Real fó apresiasaun ba TIC TIMOR ne’ebé  introdus servisu Governu nian mai funsionáriu sira iha munisípiu Ainaru.

“Ita moris iha seklu 21 seklu dijitál tanba ne’e tenke uza Sistema dijitál sira hodi arkiva dadus ema nian, dadus rikusoin Ainaru nian, atu nune’e memória institusional labele lakon,” dehan PAM Ainaru.

Prezidente Autoridade realsa tan katak, sistema dijitál sira ne’e atu bele promove Munsípiu Ainaru liu husi portál munisipíu nian. Ho ida ne’e TIC TIMOR nia prezensa atu ajuda munisípiu Ainaru atu halo servisu ho dijitál.

Hein katak informasaun sira ne’ebé fó husi TIC TIMOR bele ajuda funsionáriu sira iha sira nia servisu lorloron nian.

Entretantu sensibilizasaun ne’e hala’o iha Administrasaun Munisipál Ainaru no partisipa mós husi reprezentante KFP no INAP nian.  (MÉDIA TIC)