DÍLI, 23 de Setembru de 2024__Ajénsia TIC TIMOR I.P., liu husi Diresaun Dezenvolvimentu Sistema Informasaun no Aplikasaun (DDSIA ) fó formasaun jestaun administrasaun portal ofisiál ba funsionáriu husi Ministériu Koordenador Asuntu Ekonómiku (MKAE).

Objetivu husi formasaun ida ne’e, atu fó kapasitasaun ba funsinonáriu sira husi MKAE nian kona ba formas oinsá atu bele jere no administra Portal Ofisiál hodi bele tranzimite informasaun kona-ba atividade MKAE nian públiku.

Iha abertura ba formasaun ida ne’e, Koordenador Jerál Gabinete Vise-Primeiru Ministru, MKAE no MTA, Sr. Jorge Rui de Carvalho Martins, hato’o agradesimentu ba TIC TIMOR ne’ebé disponivel ona atu dezenvolve portal ofisiál ida ne’e, atu nune’e bele halo publikasaun ba atividade MKAE nian.

Kordenadór Vise-Primeiru Ministru esklarese katak, Governu estabelese ona polítika atu kria Governu Eletróniku no polítika iha impementasaun estratéjia kona-ba modernizasaun administrativa, hodi dezenvolve valor adisionál husi Governu Eletróniku, inklui estabelesimentu plataformas konektividade ho asesu ba internet, iha instituisoens Estadu no Governu nian tomak atu nune’e bele publika informasoens ba sosiedade em jeral.

“Formasaun ida ne’e, importante tebes atu kapasita funsionáriu atu nune’e bele jere portal ofisiál hó di’ak hodi fahe informasaun kona-ba atividade MKAE nian ba públiku,” dehan Koordenadór Vise-Primeiru Ministru.

Parte MKAE mós sei kontinua solisita TIC TIMOR nia ajuda atu fó   apoiu tékniku nune’e bele realiza  servisu ne’ebé  integradu.  

Koordenadó Vise-Primeiru Ministru ne’e mós husu ba funsionáriu sira atu aproveita formasaun ida ne’e hodi di’ak, atu bele jere no administra portal hó di’ak.

Iha fatin hanesan, Xefe Departamentu Kapasitasaun Sr. Noberto Soares Cristovão hatete, formasaun ida ne’e nudar parte ida husi programa TIC TIMOR nian no haktuir pedidu husi MKAE hodi dezenvolve portal ofisiál no formasaun ida ne’e, atu hasa’e koñesimentu partisipante sira nian hó objetivu atu sira bele jere portal refere hó formas diak liu.

Liu tan, Xefe Deaprtamentu ne’e mos esplika katak programa kapasitasaun ne’e mós sai hanesan papél TIC TIMOR nian, atu fó apoiu ba instituisaun estadu sira iha implementasaun Governu Eletróniku, previstu iha termus 2.8. kona ba Tecnologias de Informação e Comunicação (TIC) no 6.7. Governo Eletrónico IX Governu Konstitusional ne’ebe atribui ba TIC TIMOR hanesan misaun importante no imperative atu realiza.

“Portal ofisiál importante tebes tanba agora dadauk iha plataforma oi-oin ne’ebé ladun kredível  hanesan meius atu transmite informasoens nune'e portal ofisiál sai hanesan meius ne'ebe kredível atu tranzmite informasaun ministériu nian,” edplika Xefe Deaprtamentu. Hein katak iha formasaun ida ne’e, formandu sira bele aproveita didi’ak oportunidade iha formasaun ida ne’e atu iha futuru formandu sira bele halo jestaun rasik ba portal MKAE nian. 

Nia parte lori TIC TIMOR nian naran,  hato’o agradesimentu ba MKAE ne’ebé fó ona konfiansa ba TIC TIMOR hodi dezenvolve portal ofisiál ida ne’e.

Entretantu formasaun ne’e, hala’o durante loron rua iha edifísiu Trade Investe Kolmera. Hafoin formasaun remata, TIC TIMOR mós  atribui sertifikadu apresiasaun ba formandu sira. (Média TIC)