DILI, 25 Setembru 2024_ Ajénsia TIC TIMOR I.P., liu husi Diresaun Dezenvolvimentu Sistema Informasaun no Aplikasaun (DDSIA) fó formasaun jestaun administrasaun portal ofisiál ba funsionáriu husi Ministériu Komériu Indústria (MKI).

Objetivu husi formasaun ida ne’e, atu fó kapasitasaun ba funsinonáriu sira husi MKI nian kona-ba forma oinsá atu bele jere no administra portal ofisiál hodi bele tranzimite informasaun kona-ba atividade MKI nian públiku.

Iha abertura ba formasaun ne’e, Xefe Gabinete MKI Sr. Julito Soares lori MKI nia naran agradese ba TIC TIMOR ne’ebé fó ona apoiu hodi redezeña fali portal ofisiál MKI nian tanba komérsiu indústria sai hanesan autor ba dezenvolvimentu ekonomia iha Timor-leste ho ida ne’e presiza tranzmite atividade MKI nian liu husi pirtál ne’e atu nune’e públiku bele hatene.

Portal ofisiál importante tebes tanba dala barak ema uza Plataforma seluk hodi fahe informasaun bele estraga kredibilidade ministériu maibé ho portál ne’ebé dezenvolve husi TIC TIMOR sei publika atividade sira ofisialmente.

Iha fatin hanesan, Xefe Departamentu Kapasitasaun Sr. Noberto Soares Cristovão hatete, formasaun ida ne’e nudar parte ida husi programa TIC TIMOR nian no haktuir pedidu husi MKI hodi dezenvolve portal ofisiál no formasaun ida ne’e, atu hasa’e koñesimentu partisipante sira nian hó objetivu atu sira bele jere portal refere hó formas di’ak liu tan.

 Xefe Departamentu ne’e mos esplika katak programa kapasitasaun ne’e mós sai hanesan papél TIC TIMOR nian, atu fó apoiu ba instituisaun estadu sira iha implementasaun Governu Eletróniku, previstu iha termus 2.8. kona-ba Teknolojia Informasaun no Komunikasaun no 6.7. Governu Eletróniku IX Governu Konstitusional ne’ebe atribui ba TIC TIMOR hanesan misaun importante no imperative atu realiza.

“Portal ofisiál importante tebes tanba agora dadauk iha plataforma oi-oin ne’ebé ladun kredível hanesan meius atu transmite informasoens nune'e portal ofisiál sai hanesan meius ne'ebe kredível atu tranzmite informasaun ministériu nian,” esplika Xefe Departamentu.

Hein katak iha formasaun ida ne’e, formandu sira bele aproveita didi’ak oportunidade iha formasaun ida ne’e atu iha futuru formandu sira bele halo jestaun rasik ba portal MKI nian. 

Nia parte lori TIC TIMOR nian naran, hato’o agradesimentu ba MKI ne’ebé fó ona konfiansa ba TIC TIMOR hodi dezenvolve portal ofisiál ida ne’e.

Entretantu formasaun ne’e, hala’o durante loron rua iha edifísiu Trade MKI Bebora. Hafoin formasaun remata, TIC TIM OR mós atribui sertifikadu apresiasaun ba formandu sira. (Média TIC)