MANATUTU, 25 de Setembru de 2024—Ekipa Ajénsia TIC TIMOR I.P. realiza Sensibilizasaun Governu Eletroníku ba funsionáriu husi liñas ministerial sira iha Munisípiu Manatutu inklui reprezentante autoridade lokál sira.

Objetivu prinsipál husi sensibilizasaun ida ne’e, atu promove servisu dijitálizasaun iha kontestu Governu Eletróniku nian.

Iha abertura sensibilizasaun ida ne’e, Diretór Diresaun Dezenvolvimentu Sistema Informasaun no Aplikasaun (DDSIA) TIC TIMOR, Sr. Justo Fernandes, hateten katak, sensibilizasaun ne’e, sei halo aprezentasaun kona-ba servisu prinsipál sira relasiona hó Governu Eletróniku, tanba TIC TIMOR maka hanesan Ajénsia implementadór ba programa IX Governu Konstitusionál.

TIC TIMOR servisu em koordensaun hó Komisaun Funsaun Públika (KFP) no INAP sei realiza  preparasaun ba tinan oin bazeia ba programa IX Governu Konstitusionál, realtivamente hó formasaun iha área teknolojia ba funsionáriu públiku tomak iha Timor-Leste inklui nível Diretór sira.

Sensibilizasaun ida ne’e importante tebes antes atu tama ba iha implementasaun programa tamba hanesan formas atu bele identifika koñesimentu funsionáriu sira nian iha munisípiu hotu.

Diretór DSIA esplika katak, papél importante husi Ajénsia TIC TIMOR haktuir ba dekretu lei númeru 29/ 2017 atu implementa polítika teknolojia informasaun no komunikasaun tanba ne’e, iha sensibilizasaun ida ne’e, iha pontu importante lima ne’ebé TIC sei aprezenta maka hanesan; Timor Dijitál, Sistema Aplikasaun sira ne’ebé dezenvolve husi TIC TIMOR, Infraestrutura Rede, Sentru Dadus no Seguransa Sibernétika.

Sensibilizasaun ne’ebe TIC TIMOR realiza ne’e, bazeia ba programa IX Governu Konstitusionál  previstu iha termus número 2.8. kona ba Tecnologias de Informação e Comunicação (TIC) no 6.7. Governu Eletróniku husi programa IX Governu Konstitusional ne’ebe atribui ba TIC TIMOR hanesan misaun importante no imperative atu realiza.

“Liu husi programa rua ne’ebe temi ona iha leten, TIC TIMOR sei identifika nível koñesimentu husi funsionáriu sira hotu, atu nune’e, bele servisu hamutuk hó parte INAP no KFP hodi prepara matéria nesesárias ba implementasaun kapasitasaun iha área teknolojia iha tinan oin mai,” salienta Diretór DSIA ne’e.

Iha fatin hanesan, Sekretaria Munisipál Planeamentu Investimentu Dezenvolvimentu Integradu Sra. Domingas Gilpia da Costa Soares, hato’o apresiasaun ba TIC TIMOR ne’ebé iha ona disponibilidade atu realiza sensibilizasaun kona-ba Governu Eletróniku tanba ne’ebe bele mellora kapasidade no koñesimentu ba funsionáriu sira hodi fasilita  iha implementasaun misaun de servisu ne’ebe ajuda tebes ba asesu  informasaun hotu iha servisu fatin.

Sekretária ne’e mós solisita ba partisipantes  hotu atu aproveita oportunidade sensibilizasaun ida ne’e hó diak, atu nuen’e bele aumenta diak liu tan funsionáriu sira nia koñesimentu kona-ba formas aplikasaun Governu Eletróniku nian. 

Entretantu sensibilizasaun ne’e hala’o iha Administrasaun Munisipál Manatutu no partisipa mós husi reprezentante husi KFP no INAP nian.  

(MÉDIA TIC)