Díli, 01 Outubru 2024—Diretór Ezekutivu Ajénsia TIC TIMOR I.P., Sr. Venâncio Pinto hamutuk ho ekipa Ezekutivo hala’o enkontru de koordensaun hó ekipa husi United Nations Development Programme (UNDP) iha edifisiu TIC TIMOR Caicoli.       

Objetivu husi enkontru ida ne’e, atu aborda kestoens ne’ebe United Nations Development Programme (UNDP) hato’o kona ba intensaun atu estabelese koordenasaun de servisus hó TIC TIMOR ligadu hó Transformasaun dijital iha Timor-Leste.

Iha enkontro ida ne’e, UNDP CTA Sr.  Bruno hatete, sira ninia projetu ne’e, agora dadaun ninia prosesu la’o hela dadaun, sira presija ideias no inputs husi  TIC TIMOR atu bele hetan solusaun ba projetu refere.

“UNDP atualmente hala’o hela  projetu transformasaun dijitál ne’ebé nia prosesu agora dadaun la’o hela, ninia objetivu prinsipál mak oinsa bele apoíu dezenvolvimenetu transformasaun dijitál iha Timor-Leste, ho razaun hirak ne’e ami hakarak halo diskusaun ho parte TIC TIMOR hodi buka solusaun apropriadu atu resolve kestoens existentes ne’ebe sidauk iha solusaun” Sr. Bruno Salienta.  

Iha fatin hanesan Diretór Ezekutivu Ajénsia TIC TIMOR I.P., Sr. Venâncio Pinto mós halo introdusaun kona-ba progresu servisu ne’ebé TIC TIMOR atinje ona durante ne’e, ne’ebé fó vantajen boot ba prosesu transformasaun Dijitál iha Timor-Leste.

“TIC TIMOR hanesan instituisaun estadu ida ne’ebé hetan konfiansa hodi implementa Governu Eletroniku iha Timor-Leste ne’ebé agora dadaun nia progresu de servisu atinje hó diak tebes, hahú husi nasional to’o munisipiu ne’ebé ninia konetivida integradu ho asesu lokalmente, tantu aplikasaun sira ne’ebé dezenvolve husi TIC TIMOR  asesu ho intranet” informa superior ne’e.  

Lider masímu Ajénsia TIC ne’e mos realsa tan katak, “Instituisaun barak ona mak rai sira nia dadus iha TIC TIMOR no iha futuru sei iha tan instituisaun importante barak mak sei hosting iha TIC TIMOR no iha rekuse barak mak sei kontinua husu”.

Iha prosesu transformasaun dijitál ba futuru TIC TIMOR sei foku ba área ha’at hanesan iha área edukasaun, saúde, agrikultura, estatal, informa Diretór Ezekutivu ba ekipa UNDP.

Iha oportunidade ida ne’e Diretór husi kada diresaun iha Ajénsia TIC TIMOR inklui kada Únidade aprezenta mós sira nia progresu de servisu ne’ebé durante ne’e sira atinje ona, inklui planu prioridade hirak ne’ebé sira sei implementa iha tinan oin.

Entretantu iha enkontru ne’e partisipa mós husi Diretores kada diresaun, Assesor, Xefi Únidade sira nomos ekipa husi UNDP.

(Média TIC)