LAUTÉM, 07  Outubru, 2024—Ekipa Ajénsia TIC TIMOR I.P. hala’o Sensibilizasaun Governu Eletroníku ba funsionáriu iha liña ministeriál sira iha Munisípiu Lautém nomós reprezentante autoriedade lokál sira.

Objetivu prinsipál husi sensibilizasaun ida ne’e, hanesan formas atu promove servisu dijitál iha kontestu Governu Eletróniku ninian.

Iha abertura sensibilizasaun Diretór Diresaun Dezenvolvimentu Sistema Informasaun no Aplikasaun (DDSIA) TIC TIMOR, Sr. Justo Fernandes hateten katak, liu husi sensibilizasaun ida ne’e, sei aprezenta kona-ba servisu prinsipál sira relasiona hó Governu Eletróniku tanba TIC TIMOR designadu hanesan Ajénsia implementadór iha IX Governu Konstitusionál.

TIC TIMOR servisu hamutuk ho Komisaun Funsaun Públika (KFP) no INAP sei halo preparasaun ba tinan oin bazeia ba programa IX Governu Konstitusionál kona-ba formasaun área teknolojia ba funsionáriu públiku tomak iha Timor-Leste inklui nível Diretór sira.

Sensibilizasaun ida ne’e konsiderado importante tebes antes atu tama ba implementasaun programa, nune’e, bele identifika koñesimentu funsionáriu sira nian, iha munisípiu hotu.

Diretór DSIA ne’e esplika, papél importante husi Ajénsia TIC TIMOR haktuir ba dekretu lei númeru 29/ 2017 atu implementa polítika teknolojia informasaun no komunikasaun tanba ne’e, iha sensibilizasaun ne’e iha pontu importante lima ne’ebé sei aprezenta maka hanesan, Timor Dijitál, Sistema Aplikasaun sira ne’ebé dezenvolve husi TIC TIMOR, Infraestrutura Rede, Sentru Dadus nomós Seguransa Sibernétika.

TIC TIMOR ninia programa sensibilizasaun ida ne’e, bazeia ba programa IX Governu Konstitusional ne’ebe previstu iha númeru 2.8 kona-ba Teknolojia Informasaun, no Komunikasaun no número 6.7  kona-ba Governu Eletrónika.

“Liu husi programa rua ne’e TIC TIMOR sei hare nível koñesimentu husi funsionáriu sira, nune’e, bele servisu hamutuk hó parte INAP no KFP atu halo preparasaun ba matéria hodi bele halo kapasitasaun iha área teknolojia nian iha tinan oin,” esplika Diretór DSIA.

Iha fatin hanesan Prezidente Autoridade Munisípiu Lautém Sr. Melio de Jesus agradese ba TIC TIMOR ne’ebé iha inisiativa ona atu halo sensibilisaun Governu Eletróniku iha munisípiu Lautém.

Husu ba funsionáriu sira hotu aproveita sensibilizasaun ida ne’e ho di’ak  tanba Timor-Leste restaura ninia independensia ba dala 22 ona, tamba ne’e, tenke adapta teknolojia ne’ebé  avansadu atu nune’e bele  halo atendementu ho di’ak ba públiku.

Entretantu sensibilizasaun ne’e hala’o iha Administrasaun Munisipál Lautém no partisipa mós husi reprezentante KFP no INAP nian.