Oé-Cusse,10 Outubru 2024—Ajénsia TIC TIMOR I.P. realiza Sensibilizasaun Governu Eletroníku ho tema “Revolusiona Governu ho servisu dijitál ne’ebé asesivel promove Boa-Governasaun no hasa’e prestasaun servisu Governu nian ba funsionáriu husi liña ministerial sira iha Rejiaun Administrativa Espesial Oé-cusse Ambeno nomós reprezentante PNTL, F-FDTL inklui autoriedade lokál sira. 

Objetivu husi sensibilizasaun ne’e atu habelar informasaun no promove servisu dijitálizasaun iha kontestu Governu Eletróniku nian hahu husi nasional to’o minisipiu hodi introduz programa IX Governu Konstituisional nian.

Iha atividade sensibilizasaun ne’e, Diretór Ezekutivu Interinu Ajénsia TIC TIMOR I.P. hanesan mós Diretór Diresaun Dezenvolvimentu Sistema Informasaun no Aplikasaun (DDSIA) TIC TIMOR, Sr. Justo Fernandes hatete, programa ida ne’e importante tebes hodi partilla informasaun ne’ebé relasiona ho teknolojia bazeia ba programa IX Governu Konstitusional nian.

“Sensibilizasaun Governu Eletronika ida ne’e, iha Timor-Leste, ha’u hanoin pertinente tebes, Konsire katak, informasaun sira ne’ebé ami hato’o aliña ho programa IX Governu Konstituisional ne’ebé koalia kona-ba Governu Eletronika no Teknolojia Informasaun no Komunikasaun”.

Diretór ne’e mós halo introdusaun kona-ba ezistênsia husi Ajénsia TIC TIMOR ne’ebé estabelese liu-husi dekretu lei numeru 29/2017, inklui pontu importante tolu ne’ebé sei hala’o iha Timor-Leste partikularmente iha área teknolojia ninian.  Primeiru, kona-ba planu integradu sira ne’ebé Governu sei hala’o iha tinan sanulu nian, tantu iha nível nasional to’o ba Oé-cusse Ambeno.  Segundu, Munisipiu inklui Oé-cusse bele asesu servisu Governu sira liu-husi rede lokál. Terseiru, kona-ba Governu Eletronika ne’ebé foku ba sistema sira. 

Informasaun hirak ne’ebé fahe iha sensibilizasaun ida ne’e mak hanesan Timor Dijitál, Dezenvolvimentu Sistema Aplikasaun, Infraestrutura Rede, Sentru Dadus nomós Seguransa Sibernétika.

Diretór ne’e saliente tan katak, informasaun ne’ebé partilla husi TIC TIMOR, la’os atu halo funsionariu sira lakoi atu utiliza teknolojia, maibé, oinsa atu iha komprensaun ba utilizasaun teknolojia nian iha servisu fatin, inklui iha fatin ne’ebé de’it.

“Informasaun hirak ne’ebé ami hato’o, laos atu hela hó ita boot sira de’it, maibé atu fahe koñesimentu, hodi nune’e, ita bele uza tuir nia dalan.  Nune’e, labele monu ba nia lasu no labele sai vitima ba teknolojia”informa Diretór ne’e.

Iha fatin hanesan, Sekretariu Rejionál Assuntu Administrasaun Sr. Andre La’o hatete, “sensibilizasaun ida ne’e importante tebes ba sira, tanba agora dadaun mundu tama ona ba iha era teknolojia modern,  tanba ne’e funsionariu sira tenke aproveita oportunidade ida ne’e hó diak.

“Téknikamente agora dadaun iha mundu globalizasaun ligadu hó atendimentu públiku iha Timor-Leste, I agradese tebes tamba, liu-husi programa IX Governu ne’ebé TIC TIMOR hanesan instituisaun publiku fahe mai ami, ida ne’e diak tebes, hodi halo mudansa boot ba servisu loron-loron nian iha instituisaun estadu sira hotu”.

Sekretariu ne’e mós sente orgullu no agradese tebes, tamba, tekniku mesak timoroan ne’ebé hala’o sira nia knar iha TIC TIMOR. Tamba ne’e, tenke kria kooperasaun diak hodi implementa dijitalizaun iha instituisaun estadu sira hotu. 

“Tanba ne’e ita presija iha koñesimentu klean liu husi ita nia matenek nain ne’ebé mesak timoroan de’it ne’ebé durante ne’e eziste hela iha Timor laran. Ita presija koopera ho sira hodi nune’e buat hotu ne’ebé iha ligasaun hó teknolojia sei la  prejudika ita nia servisu. Ami mós agradese ba tekniku TIC nian ne’ebé komesa ona hala’o ninia knar iha reziaun administrasaun RAEOA, tanba ne’e ami hato’o agradesimentu ba Diretór Ezekutivu Ajénsia TIC TIMOR”.

Iha aprezentasaun ne’e parte Timor Dijitál  nian mós aprezenta sira nia servisu no planu  husi Koordenador Timor Dijitál Sr.  Eusebio de Jesus Pinto Exposto Goveia, husi Diresaun Servisu Infraestrutura no Rede aprezenta husi Diretór Sr. Andre Felix Marques, husi Sentru Dadus aprezenta husi  Departamentu Infrastrutra Rede Sentru Dadus  Sr. Agapito dos Santos Barreto, Seguransa Sibernétika aprezenta husi Xefi Sr. Agostinho Araujo Pereira no husi parte Diresaun Dezenvolvimentu Sistema Informasaun no Aplikasaun nian aprezenta husi Junior Profesional Software Developer Sra. Isabel Waruily Dos Anjos Madeira.

Iha atividade sensibilizasaun ne’e parte husi Diresaun Servisu Korporativu Ajénsia TIC TIMOR lidera husi Diretora Sra. Helen Esmeralda Catarina Gomes no ekipa entrega mós Tekníku Helpdesk ida ne’ebé sei deskata iha ne’eba atu fó asistensia tekníka nessesarias iha RAEOA.

Partisipante hirak ne’ebé marka prezensa mak hanesan;  Sekretária Rejionál Agrikultura, Sra. Filomena Sila, reprezentante husi PNTL, FFTL, Kargu Xefi sira husi Ajénsia TIC TIMOR I.P. Diretores Rejionáis, Xefe Departamentu no funsionáriu iha RAEOA.