KOVALIMA, 15 Outubru, 2024—Ekipa Ajénsia TIC TIMOR I.P. hala’o Sensibilizasaun Governu Eletróniku ba funsionáriu iha liña ministeriál sira iha Munisípiu Kovalima nomós reprezentante autoriedade lokál sira.

Objetivu prinsipál husi sensibilizasaun ida ne’e, hanesan formas atu promove servisu dijitál iha kontestu Governu Eletróniku ninian.

Iha abertura sensibilizasaun, Diretór Diresaun Centru Dadus TIC TIMOR, Sr. Rusmin Vicente de Fátima Soares hateten, papél importante husi Ajénsia TIC TIMOR haktuir ba dekretu lei númeru 29/ 2017 atu implementa polítika teknolojia informasaun no komunikasaun tanba ne’e, iha sensibilizasaun ne’e iha pontu importante lima ne’ebé sei aprezenta maka hanesan, Timor Dijitál, Sistema Aplikasaun sira ne’ebé dezenvolve husi TIC TIMOR, Infraestrutura Rede, Sentru Dadus no Seguransa Sibernétika.

TIC TIMOR nia programa sensibilizasaun ida ne’e, bazeia ba programa IX Governu Konstitusional ne’ebe previstu iha númeru 2.8 kona-ba Teknolojia Informasaun, no Komunikasaun no número 6.7 kona-ba Governu Eletrónika.

Liu husi sensibilizasaun ida ne’e, sei aprezenta kona-ba servisu prinsipál sira relasiona hó Governu Eletróniku, tanba TIC TIMOR designadu hanesan Ajénsia implementadór iha programa IX Governu Konstitusionál.

TIC TIMOR servisu hamutuk ho Komisaun Funsaun Públika (KFP) no INAP sei halo preparasaun ba tinan oin bazeia ba programa IX Governu Konstitusionál kona-ba formasaun área teknolojia ba funsionáriu públiku tomak iha Timor-Leste, inklui nível Diretór sira.

Sensibilizasaun ida ne’e konsidera importante tebes, antes atu tama ba implementasaun programa, nune’e, bele identifika koñesimentu funsionáriu sira nian, iha munisípiu hotu.

“Liu husi programa rua ne’e TIC TIMOR sei hare nível koñesimentu husi funsionáriu sira, nune’e, bele servisu hamutuk hó parte INAP no KFP atu halo preparasaun ba matéria hodi bele halo kapasitasaun iha área teknolojia nian, iha tinan oin,” esplika Diretór Centru Dadus.

Iha fatin hanesan Prezidente Autoridade Interinu Sr. Caitano dos Santos Ribeiro hatete, servisu Governu Eletróniku sei fasilita servisu administrasaun públiku.

Ho ida ne’e, funsionáriu sira presiza partisipa sensibilizasaun ida ne’e ho másimu atu bele hatene kona-ba servisu Governu Eletróniku, nune’e iha tinan oin main, bainhira tama ba formasaun, funsionáriu sira iha ona koñesimentu jerál kona-ba área ICT nian.

Entretantu sensibilizasaun ne’e hala’o iha edifísiu Administrasaun Munisípiu Kovalima. #MÉDIA TIC#