DÍLI, 16 Outubru 2024__Tékniku Ajénsia TIC TIMOR I.P., liu husi Diresaun Dezenvolvimentu Sistema Informasaun no Aplikasaun (DDSIA) fó formasaun Sistema Jestaun Patrimóniu ba funsionáriu sira husi Ministériu Edukasaun liu husi Diresaun Nasionál Patrimóniuno Lojístika.

Iha abertura ba formasaun ne’e, Diretór Nasionál Sistema Informátika no Teknolojia Ministériu Edukasaun Sr. Jonio Guterres agradese ba TIC TIMOR ne’ebé suporta ona Ministériu Edukasaun hodi dezenvolve Sistema Jesatun Patrimóniu.

Diretór ne’e esplika katak, ida ne’e nudar pasu importante tebes hodi halo jestaun patrimóniu hodi bele monitoriza dadus. Liu husi formasaun iha loron tolu ne’e, formandu sira bele aprende di’ak liu kona-ba utiliza sistema ida ne’e.

Iha fatin hanesan Xefe Departamentu Kapasitasaun Sr. Noberto Soares Cristovão hatete, formasaun ne’e hanesan papél ida husi TIC TIMOR hodi implementa Governu Eletróniku atu suporta instituisaun estadu sira liu husi dezenvolvimentu Sistema Aplikasaun sira.

Formasaun Sistema Jestaun Patrimóniu ne’ebé haktuir ba pedidu husi Ministériu Edukasaun atu fasilita servisu Diresaun Nasionál Patrimónu no Lojístika.

Xefe Departamentu ne’e esplika, sistema ida ne’e kompleta ona ninia faze dezenvolvimentu no agora tama ba faze formasaun oinsá atu bele utiliza sistema ne’e.  Formasaun ida ne’e, la’os ikus ona, maibé TIC TIMOR sei fó nafatin asisténsia téknika ba Ministériu Edukasaun wainhira iha nesesidades.

Lori TIC TIMOR nia naran hau hato’o agrdesimentu ba parte Ministériu Edukasaun ne’ebé fó ona konfinsa hodi dezenvolve sistema aplikasaun ida ne’e hodi fasilita servisu.

Entretantu fromasaun ne’e hala’o iha edifísiu Ministériu Edukasaun Vila-Verde. Hafoin finaliza formasaun ne’e TIC TIMOR fornese sertifikadu apresiasaun ba funsionáriu sira ne’ebé partisipa ona formasaun ne’e.   (MÉDIA TIC)