KOVALIMA, 21 Outubru 2024, Tékniku Ajénsia TIC TIMOR I.P. liu husi Diresaun Dezenvolvimentu Sistema Informasaun no Aplikasaun (DDSIA) fo formasaun Sistema Informasaun sira hanesan, Sistema Cloud GoTL, Sistema Ofísiu no Sistema Rekursu Umanu ba funsionáriu  sira husi autoridade munisípiu Kovalima.

Iha abertura ba formasaun ne’e, Xefe Departamentu Kapasitasaun TIC TIMOR Sr. Norberto Soares Cristovão afirma, formasaun ne’e atu hasa’e koñesimentu funsionáriu sira nian oinsá utiliza Sistema Dijital sira hodi fasilita sira nia aktividade servisu ho efetivu no efisiente liu.

Formasaun ida ne’e mos parte ida husi papel importante TIC TIMOR nian oinsá atu implementa Governu Eletróniku tanba ne’e TIC TIMOR mai atu suporta autoridade munisipiu kovalima hodi implementa Sistema Dijital sira.

Xefe Deapartamentu ne’e mos informa katak, formasaun refere, la’os ikus ba apoio TIC TIMOR nian mai Autoridade, maibé TIC TIMOR sei nafatin fó asisténsia téknika hodi garante sustentablidade Sistema sira iha future, espera katak, formasaun ida ne’e formandu sira bele gaña matéria  ne’ebé formadór sira fó  hodi bele implementa duni iha sira nia servisu fatin.

O Chefe do Departamento lori TIC TIMOR nia naran hato’o agrdesimentu ba Autoriedade Munisipiu Kovalima ne’ebé fó ona konfiansa ba TIC TIMOR hodi dezenvolve sistema aplikasaun  hirak ne’e hodi fasilita servisu Autoriedade Munisípiu nian.

Iha fatin hanesan, Sekretáriu Autoriedade Munisipál Administrasaun no Finansas Sr. Alberto Moniz de Araújo agradese ba TIC TIMOR ne’ebé disponivel ona hodi dezenvolve Sistema hirak ne’e no fó ona formasaun kona-ba oinsa atu utiliza Sistema ne’e. Husu ba formandu sira atu bele aproveita formasaun ida ne’e ho di’ak hodi bele  jere Sistema sira ne’e.

Entretantu formasaun ne’e, hala’o iha Autoriedade Munisípiu Kovalima durante loron lima. Hafoin finaliza formasaun ne’e TIC TIMOR sei   fornese sertifikadu apresiasaun ba funsionáriu sira ne’ebé partisipa ona formasaun ne’e.