Díli, 25 Outubru 2024—Ajénsia TIC TIMOR I.P. hala’o Sensibilizasaun Governu Eletroníku “Revolusiona Governu hó servisu Dijitál ne’ebé asesivel hodi bele promove Boa-Governasaun no hasa’e prestasaun servisu Governu nian ba funsionáriu sira, iha Prezidente Autoriedade Munisípiu Dili inklui reprezentante autoriedade lokál sira”.

Iha atividade sensibilizasaun ne’e, Diretór Ezekutivu Ajénsia TIC TIMOR I.P. Sr. Venâncio Pinto hatete,  iha mundu sensibilizasaun tama ona ba iha era governu eletroníku ka dijitalizasaun. Era ida ne’e mais avansadu, laos de’it asesu ba informasaun hó fasil atu utiliza feramentu dijitál sira, maibé revolusaun inovasaun nomos teknolojia lori ita to’o iha etapa ida ne’ebé integra teknolojia mais avansadu sira iha prosesu fabrikasaun no produsaun karakteristika teknolojia Four point O no agora ita tama tan ba iha  five point O.   

Ida ne’e lori ita ba konseitu ida katak, teknolojia mundu ohin loron laos ona hanesan nesesidade sekundária maibé teknolojia sai ona hanesan nesesidade primária ba ita. Atu implementa no utiliza teknolojia mais modernu sira iha Timor-Leste, responsabilidade tomak la’os mai husi TIC mesak ka ema ida de’it, maibé mai husi Instituisaun governu, sosiedade sivil, media. Tamba ne’e, ita hotu-hotu iha responsabilidade moral atu implementa dijitalizasaun iha Timor-Leste.

Koalia kona-ba literasia dijitál ka governu eletroníku, sei la ses husi sensibilizasaun ida ne’e, ne’ebé foka liu ba asuntu importante sira kona ba paijazem dijitál nian, oinsa hasa’e ita nia abilidade ba utilizasaun teknolojia dijitál ho efetivu, hodi asesu ba informasaun komunikasaun, rezolve problema no kria konten sira, hasa’e kapasidade oinsa atu asesu ba informasaun sira ho kritiku nomos intrepreta konten média sira, distingi fontes sira ne’ebé la kredivél ka informasaun falsu sira.

Lider masimu Ajénsia ne’e mós informa tan katak, iha tinan ida ne’e projetu kabu submarinu sei implementa iha Timor-Leste, nune’e bele fasilita ona internet hó kapasidade no kualidade ne’ebe diak.

“Atu informa ba ita boot sira katak, iha fulan Novembru ka Dezembru, ita sei simu projetu boot ida ho naran Kabu Submarinu, ne’e sei lori prosesu boot ida ho internet ida ne’ebé ho kapasidade boot. Tamba ne’e, iha sensibilizasaun ida ne’e hó objetivu atu prepara ita, bainhira kabu submarinu ne’e tama, ita prontu ona atu utiliza internet ida ne’ebé ho alta kapasidade.

Ita separa tiha buat rua, ida ita koalia kona-ba Governu Eletroniku, no ida kona-ba Transformasaun Dijitál. Governu Eletroniku katak, ita transforma servisu husi forma manual ba forma eletroniku. Tamba ne’e, dijitalizasaun signifika katak, ita bele asesu sistema sira hotu iha fatin ne’ebé de’it”.

Diretór Ezekutivu mós esklarese tan katak, sistema sira ne’e ne’ebé  implementa laos sen razaun maibé, tanba Timor tama ona iha organizasaun mundiál komérsiu, (WTO sigla Inglés), tamba ne’e Timor Leste tenke halo esforsu maxímu hodi implementa Governu Eletroníku, no tinan oin ita mós sai membru ASEAN.  Buat sira ne’e, sai nudar dezafiu ba Timor-Leste, maibé TL seidauk tarde.

Diretór Ezekutivu tenik tan katak,  iha 2025 nia espera katak, iha munisipiu Díli bele iha ona liña integradu entre munisipiu hó Postu Administrativos  sira, nune’e komunikasaun bele realiza liu husi email de’it. 

Superior ne’e mós husu atu kargu Diretór sira, Administradór Postu nomos Xefi Departamentu ne’ebé maioria funsionariu públiku, tenke aproveita oportunidade ida ne’e ho diak, tanba ko’alia kona-ba Governu Eletroniku ita halo tranformasaun husi forma manual ba formaeletroniku.  Tamba ne’e, karik iha sujestaun ka hakarak implementa sistema ruma iha edifisiu Postu Administrativu, TIC prontu  fornese nia apoiu.

Iha fatin hanesan, Prezidente Autoriedade Munisipiu Dili (PAM), Sr. Gregório Saldanha hatete, hó sensibilizasaun ne’e nudar pasu importante ida hodi halo mudansa.

“Mundu agora dadaun klot, transparente liu, buat segredu la iha tanba ne’e iha momentu sira hanesan ne’e mak pratikamente avansu teknolojia halo mundu sai lalais, ita koalia kona-ba Governu eletroniku ho dijitalizasaun tanba revolusiona governasaun”.

PAM Dili ne’e saliente tan katak, mundu teknolojia iha avansu ne’ebe signifikante iha nasaun seluk, maibé Timor-Leste mós kontinua halo esforsu hodi bele bele involve aan iha mundu teknolojia sira ne’e.

“Iha mundu ne’ebé modern, teknolojia  la’o dok ona, maibé Timor-Leste mós lakoi lakon, Ita atu tama ona ba Asean ho WTO, tamba ne’e, ita presija adapta ona ambiente ida ne’ebé teknolojia ne’ebé avansadu ona. Ho momentu sira hanesan nene, teknolojia ne’ebé avansadu ne’e hodi aselera servisu ho diak liu”.

Prezidente ne’e salienta tan katak, ho sensilibizasaun ne’e, sira oportunidade atu hetan informasaun husi Ajénsia TIC TIMOR, nune’e bele integra ona iha Munisipiu Díli hanesan mós kriteria ida husi programa IX Governu nian, ne’ebé susesu iha governasaun ne’ebé povu fó konfiansa.

Ikus liu Prezidente Autoriedade Munisipiu Díli ne’e mós hato’o agradesimentu ba Diretór TIC TIMOR ho nia ekipa tomak, ne’ebé ho planu  importante tebes iha realizasaun  sensibilizasaun ba materia ida ne’e.

Durante sensibilizasaun ida ne’e, efetua mos aprezentasaun husi Únidade Timor Dijitál, Únidade Seguransa Sibernetika, Diresaun Dezenvolvimentu Sistema Informasaun no Aplikasaun, Diresaun Servisu Infraestrutura Rede, Diresaun Sentru Dadus.

Entretantu atividade sensibilizaun ne’e partisipa mós husi Diretor, Xefi Departamentu nomos Funsionáriu sira husi autoriedade Munisipiu Díli nian.

(Média TIC).